Nga sot Shkëmb Manaj, është nënkryetar i kryeqytetit, ka bërë të ditur Kryetari i Prishtinës Perparim Rama, i cili ka thënë se Manaj me një përkushtim të thellë për të mirën e qytetarëve dhe zhvillimin e qëndrueshëm të kryeqytetit, është një model i dedikimit në çdo hap të jetës së tij profesionale.
“Në të gjitha etapat e karrierës së tij, Shkëmb Manaj ka ruajtur integritetin e tij të palëkundur. Vlerat e tij familjare dhe kombëtare janë thelbësore në çdo vendim që merr, duke përfaqësuar me dinjitet dhe përkushtim qytetarët e vendit të tij. Ai vazhdon të përfaqësojë unitetin, bashkëpunimin dhe solidaritetin si themele të një shoqërie të zhvilluar dhe të qëndrueshme”, ka shkruar Rama në Facebook.
Tutje Rama është shprehur i sigurt se Manaj do të punojë për një të ardhme më të mirë dhe më të ndritur për qytetarët.
“Me punën e tij të deritanishme, ai ka ndihmuar në zhvillimin e një shoqërie ku secili ndjehet i respektuar dhe i vlerësuar. Jam i sigurt se do të vazhdojë të kontribuojë dhe të përfaqësojë këto vlera edhe si nënkryetar i kryeqytetit, duke punuar për një të ardhme më të mirë dhe më të ndritur për qytetarët”, ka thënë ai.
