Udhëheqësit e Federatës Sindikale të Arsimit e Shkencës së Kosovës kanë pritur udhëheqësit e Federatës Sindikale të Arsimit e Shkencës së Shqipërisë, të cilët po qëndrojnë për vizitë pune në Kosovë që nga dita e enjte.
Në këtë takim mes të dyja sindikatave u diskutuan mundësitë e bashkëpunimit në fushën e arsimit, në fuqizimin e bashkëpunimit sindikal dhe forcimin e rolit të mësimdhënësit në dy shtetet simotra.
Sot, SBASHK-u ka organizuar edhe disa takime në Pejë, Prizren e Klinë, ku delegacioni nga Shqipëria është takuar me udhëheqësit e Drejtorisë Komunale të Arsimit në Pejë, për të vizituar më pas shkollën Fillore të Mesme të Ulët “Xhemail Kada”, në këtë qytet si dhe udhëheqësit sindikal të komunës së Pejës.
Përfaqësuesit e Sindikatës së Shqipërisë, gjatë rrugës për në Pejë, vizituan edhe shkollën Fillore të Mesme të Ulët, “Azem Bejta” në Klinë.
Pas Pejës, përfaqësuesit e Shqipërisë do të vizitojnë edhe shkollën Fillore të Mesme të Ulët “Emin Duraku” në Prizren, derisa vizita e tyre, sipas njoftimit nga SBASHK-u do të përmbyllet nëpër shkollat e Kosovës ku do të takohen me mësimdhënësit në këtyre institucioneve, për të shikuar mundësinë e bashkëpunimit në fuqizimin e rolit të mësimdhënësve në Kosovë e Shqipëri.
