Ambasada e ShBA-ve në Prishtinë bëri të ditur se janë ekstraduar në ShBA dy kosovarë të dyshuar për përfshirje në krime kibernetike dhe mashtrim.
Ata akuzohen se mbikëqyrnin faqen e internetit Rydox, ku bëhej shitja e të dhënave personale të vjedhura “për kryerjen e krimeve kibernetike dhe mashtrimeve”.
Në një njoftimin për media të Ambasadës thuhet se dy të dyshuarit, 26 dhe 28 vjeç, do të përballen me drejtësinë në ShBA.
“Ne e vlerësojmë jashtëzakonisht shumë bashkëpunimin e vazhdueshëm të autoriteteve kosovare për asistencën e dhënë Qeverisë amerikane për këtë rast, i cili forcon përpjekjet tona të përbashkëta për t’i mbajtur të sigurta të dyja, si Kosovën ashtu edhe Shtetet e Bashkuara”, thuhet në njoftim.
Sipas aktakuzës, Rydox kishte gjeneruar të paktën 230 mijë dollarë të ardhura që prej kur kishte filluar në shkurt të vitit 2016.
Lidhur me rastin është arrestuar edhe një shtetas tjetër kosovar, i cili pritet të akuzohet dhe të ndiqet penalisht në Shqipëri.
