Për të parë nëse platforma e-Kosova u ofron qytetarëve shërbime elektronike efikase, të sakta, të sigurta dhe të besueshme, Zyra Kombëtare e Auditimit ka filluar auditimin e teknologjisë së informacionit me temën “Platforma e shërbimeve online e-Kosova”.
Fushëveprimi i auditimit përfshinë Agjencinë për Shoqërinë e Informacionit, e cila administron dhe menaxhon platformën e-Kosova, si dhe Ministrinë e Financave, Punës dhe Transfereve, me departamentet për Tatimin në Pronë dhe Menaxhimin e Skemave Sociale, të cilat ofrojnë shërbime përkatëse përmes platformës.
“e-Kosova është një prej sistemeve më të rëndësishme digjitale shtetërore, që ka për qëllim të modernizojë administratën publike, duke zvogëluar varësinë nga sportelet fizike dhe duke rritur transparencën e institucioneve. Pavarësisht progresit në digjitalizimin e shërbimeve, siguria e informacionit dhe integriteti i të dhënave mbeten thelbësore për besimin e qytetarëve në platformën e-Kosova”, thuhet në njoftimin e ZKA-së rreth auditimit të kësaj platforme.
Prandaj, sipas tyre, auditimi do të vlerësojë kontrollet e aplikacionit dhe masat e sigurisë së informacionit, nëse platforma ofron mbrojtje adekuate dhe garanton funksionalitet.
