“Dita Ndërkombëtare e Librit për Fëmijë” ka hapur siparin në Bibliotekën “Hivzi Sulejmani” në kryeqytet me një varg veprimtarish, duke u mbyllur sot me një orë letrare që përfshinte një mozaik të tërë pikash.
Sipas njoftimit të bibliotekës “Hivzi Sulejmani”, një numër i madh nxënësish janë regjistruar falas që nga orët e hershme të mëngjesit në institucionin e tyre, duke kulmuar me takimin e krijuesve dhe lexuesve.
“U lexua mesazhi ‘Gjuha e figurave’ – tekst artistik nga autori holandez Rian Visser, mesazh ky i sponsorizuar nga Sesioni Kombëtar i Holandës dhe lexohet në gjithë botën më 2 prill,” thuhet në njoftim.
Për nder të 2 prillit, Biblioteka “Hivzi Sulejmani” promovoi librin “Kapërce detet në krahët e imagjinatës”, tregime dhe ese të shkruara nga nxënësit pjesëmarrës në konkursin letrar, organizuar nga biblioteka vitin e kaluar dhe mbështetur nga Drejtoria për Kulturë. Për vlerat e këtyre teksteve foli poeti dhe studiuesi i letërsisë për fëmijë Xhevat Syla, i cili e vlerësoi lart imagjinatën e fëmijëve.
Është, po ashtu, traditë që këtë festë krijuesit të lexojnë poezi për fëmijë. “Karvani i Shkrimtarëve për Fëmijë”, i përbërë nga: Xhevat Syla, Ibrahim Kadriu, Xhemë Karadaku, Skender Zogaj dhe Jonuz Fetahaj, deklamuan krijimet e tyre, ndërsa voglushja Amra Ramiqi – autore e dy librave për fëmijë – deklamoi një pjesë nga vepra e saj e fundit. Këto krijime u shoqëruan në piano nga Vesa Veselaj.
Në fund, u ndanë mirënjohje për asociacione, media dhe individë që e përkrahën vazhdimisht bibliotekën.
Dita Ndërkombëtare e Librit për Fëmijë festohet që nga viti 1967 dhe është vendosur nga Organizata e Kombeve të Bashkuara për Arsim, Shkencë dhe Kulturë. Si ngjarje, ka për qëllim promovimin e leximit dhe nxitjen e dashurisë për librat tek fëmijët dhe të rinjtë.
