Rritja e pranisë së ushtarëve nga Rezervat Operative u tha se po bëhet në mbështetje të misionit të KFOR-it, dhe rritjes së aftësisë së KFOR-it për të reaguar ndaj zhvillimeve të mundshme të situatës së sigurisë.

Shtimin e këtyre trupave, ish-komandanti i FSK-së e lidh me informacionet dhe tendencën e vazhdueshme të Serbisë për destabilizim të Kosovës.  Kadri Kastrati thotë se rreziku nga shteti serb është permanent.

“Ka ecje në atë drejtim që Kosovën mund të destabilizojnë në të ardhmen grupet terroriste, të cilat janë prezentë dhe aktiv. Ata presin urdhërin nga autoritet e Serbisë për destabilizim në Kosovë qoftë me veprime individuale dhe veprime kolektikve të pjesës veriore…”, ka thënë Kastrati.

Të kundërtën e Kastratit e mendon analisti Albinot Maloku. Sipas tij, rritja e numrit të pjesëtarëve të KFOR-it në Kosovë është në kuadër të rutinës së kësaj force ku vepron.

“Në politikat e NATO-s gjithsesi prezenca e tyre tregon edhe interesin për hapësirën ku ata veprojnë. Mirëpo këtë shtim të numrit unë e shoh në angazhimin e stërvitjeve në hapësirën e tyre në Kosovë, por gjithsesi NATO e ka një kompetencë të garantuar përmes rezultateve të ndryshme që janë aktive për KFOR për rrjedhojë është interesi i sigurisë në gjithë territorin padallim…”, ka thënë ai.

Si reagues i tretë i sigurisë, KFOR ka njoftuar se ka rreth 4.700 trupa në Kosovë, të gatshëm për t’iu kundërvënë çdo kërcënimi të mundshëm.