KMDLNJ ka kundërshtuar arrestimin e 12 aktivistëve që protestuan para zyrave të ZRRE-së kundër rritjes së çmimit të energjisë elektrike, rritje kjo që sipas KMDLNJ-së është e papranueshme dhe e papërballueshme për shumicën e qytetarëve të Kosovës.
KMDLNJ e kujton opinionin se kjo është hera e tretë që çmimi i energjisë elektrike rritet gjatë mandatit katërvjeçar të qeverisë Kurti 2, që përfshin një rritje totale prej 146%. Po ashtu, organizata thekson se ZRRE ka shpërdoruar mjetet financiare të qytetarëve, duke ua fryrë faturat për të kompensuar shpenzimet e energjisë nga ana e serbëve, një çështje që ka qenë edhe në shqyrtim nga gjykatat, të cilat kanë kërkuar kompensim që ende nuk është realizuar.
ZRRE është akuzuar për diskriminim etnik ndaj qytetarëve të Kosovës, në kundërshtim me ligjet dhe Kushtetutën e Kosovës. KMDLNJ gjithashtu ka kritikuar qeverinë që nuk ka ndërmarrë asnjë masë për mbrojtjen e qytetarëve dhe është rreshtuar pas një institucioni që shkel të drejtat e njeriut.
“Propozimi i fundit për rritjen e çmimit të energjisë elektrike është kundërshtuar nga të gjitha institucionet, qytetarët, shoqëria civile, bizneset, odat ekonomike dhe mediat”, thuhet në reagim duke theksuar se KMDLNJ e quan këtë veprim një mashtrim dhe diskriminim që shkel parimin kushtetues të trajtimit të barabartë.
KMDLNJ fton qytetarët që të marrin pjesë masivisht në protestën e paralajmëruar për 5 prill 2025, kundër rritjes së çmimit të energjisë dhe kërkimin e përgjegjësisë për veprimet e ZRRE-së. Protestat paqësore janë mbështetur nga KMDLNJ, që kërkon gjithashtu që policia të mos pengojë protestat dhe të mbrojë të drejtat themelore të njeriut.
Organizata paralajmëron se rritja e çmimit të energjisë do të ketë efekte zinxhirore, duke rritur çmimet e artikujve të tjerë dhe shërbimeve. KMDLNJ i fton qytetarët që të protestojnë ekskluzivisht kundër rrezikimit të standardit të jetesës dhe të kërkojnë rritjen e pagave, pensioneve dhe asistencës sociale si kundërpeshë ndaj inflacionit. Kërkohen gjithashtu përgjegjësi për veprimet e autoriteteve, lirimin e të arrestuarve dhe ndëshkimin e përgjegjësve brenda ZRRE-së dhe ministrive përkatëse.