Kryetari i Partisë Demokratike të Kosovës, Memli Krasniqi, ka zhvilluar takim me Sekretarin për Punë të Jashtme të Mbretërisë së Bashkuar, David Lammy. Thotë ta ketë njoftuar zyrtarin e lartë britanik për vizionin e PDK-së për të marr përgjegjësinë në formimin e qeverisë së re.
“Sekretarin Lammy e informova për vizionin e Partisë Demokratike të Kosovës për të marrë përgjegjësinë në formimin e Qeverisë së re, nën udhëheqjen e Bedri Hamzës, me objektiva të qarta për zhvillimin ekonomik, rikuperimin dhe forcimin e marrëdhënieve me partnerët strategjikë dhe avancimin e integrimit euroatlantik”, ka shkruar ai.
Vizitën e Sekretarit të Jashtëm, Krasniqi e sheh si konfirmim për mbështetjen e Mbretërisë së Bashkuar për Kosovën. “Veçanërisht në këtë kohë kur kujtojmë të kaluarën dhe miqtë që qëndruan pranë nesh në luftën tonë për çlirim”, ka shkruar Krasniqi.
Thotë se Mbretëria e Bashkuar ka luajtur gjithmonë një rol të drejtpërdrejtë në proceset kyçe për Kosovën.
“E mirëpresim emërimin e Ambasadores Karen Pierce si e Dërguar e Posaçme për Ballkanin Perëndimor, duke besuar se përvoja e saj do të jetë e vlefshme edhe në proceset tjera të rëndësishme për Kosovën. Roli i Britanisë dhe uniteti i QUINT-it janë vendimtarë për stabilitetin rajonal. Kosova ka në Mbretërinë e Bashkuar një mik të dëshmuar”, ka shkruar kreu i PDK-së rreth takimit me Sekretarin e Jashtëm të Mbretërisë së bashkuar.
