Avokati i ish-presidentit të Kosovës, Hashim Thaçi, Luka Misetiq, në emër të mbrojtjes ka shprehur shqetësimin për kohëzgjatjen e procesit gjyqësor në Dhomat e Specializuara të Kosovë në Hagë. Sipas tij, procesi ka qenë i ngadalshëm dhe se koha e kaluar në paraburgim për Thaçin dhe të tjerët është periudhë e humbur në jetën e tyre.
“4 vjet e gjysmë në paraburgim, 4 vjet e gjysmë të cilat nuk mund t’i kthejnë kurrë mbrapa. Jam i zhgënjyer që u deshën 2 vjet e gjysmë që çështja e Prokurorisë të përfundonte, besoj se kjo çështje mund të përfundonte shumë më shpejt por jemi ku jemi tani”, ka thënë Luka Misetiq, avokat i ish presidentit Hashim Thaçi.
Për sa i përket provave të paraqitura nga Prokuroria, Misetiq vlerësoi se ato janë të dobëta dhe se sipas tij, shumë nga pretendimet e ngritura nuk janë mbështetur në fakte të forta.
“Nuk mund të flas për provat tani por mendoj se në fund të gjykimit do të shihni se pretendimet që nisën me raportin e Martyt nuk kanë thuajse asnjë lidhje me provat e paraqitura kundër Z. Thaçit në këtë gjykim për mbi 2 vjet. Në këtë kuptim jam shumë optimist për rezultatin që del nga ky rast, për Z. Thaçi, mendoj se provat kanë qenë shumë të dobëta dhe patjetër se do t’i argumentojmë këto para Trupit Gjykues në kohën e duhur. Por sikurse thashë, mendoj se këtyre 4 të akuzuarve u është marrë shumë kohë nga jeta dhe shpresojmë se do të përfundojë sa më parë”, tha Misetiq.
Misetiq duke folur dëshmitarët e mbrojtjes tha se disa prej tyre kanë dëshmuar në seanca publike dhe janë treguar shumë efektivë.
“Sërish nuk do ta komentoj specifikisht ndonjë dëshmitar tani, edhe po të ishte në seancë publike, sepse do t’i dëgjoni të gjitha këto argumente në kohën e duhur, por mendoj se çështja e cila është paraqitur nga ana e Z. Thaçi në fjalën hyrëse rreth rolit të tij në Ushtrinë Çlirimtare të Kosovës është vërtetuar përgjatë çështjes së Prokurorisë dhe tani neve na ka mbetur vetëm t’i argumentojmë këto para Trupit Gjykues. Kemi besimin se Trupi Gjykues e ka të njëjtën përshtypje për këtë rast sikur që e kemi ne dhe do ta presim aktgjykimin. Nëse ka drejtësi këtu, besoj se do të ketë rezultat shumë të mirë për Z. Thaçi në fund të krejt kësaj”, tha Misetiq.
Misetiq u shpreh i bindur se në fazën tjetër do të paraqiten fakte të mjaftueshme të cilat sipas tij do të dëshmojnë se kredibiliteti i provave të paraqitura nga Prokuroria është vënë në dyshim. Pavarësisht të gjitha sfidave, Misetiq mbetet optimist për një përfundim të drejtë të çështjes.
