Policia e Kosovës, konkretisht Departamenti i Policisë Kufitare, në bashkëpunim me autoritetet tjera relevante, ka realizuar disa operacione me qëllim të parandalimit dhe luftimit të kontrabandës dhe aktiviteteve tjera të kundërligjshme.
Gjatë një kontrolli të detajuar në një automjet furgon, njësitë e Anti Kontrabandës së Doganës së Kosovës, së bashku me Inspektorët e Administratës Tatimore të Kosovës (ATK), zbuluan se ngarkesa e deklaruar si lodra për fëmijë ishte, në fakt, kozmetikë e kontrabanduar.
Sipas njoftimit vlera e mallit të sekuestruar arrin në 13,616 euro. Hetimet lidhur me këtë rast po vazhdojnë në bashkëpunim me stacionin policor kompetent dhe ATK-në.
Tutje thuhet se po ashtu, po më 1 prill 2025, patrullat policore kufitare në fshatin Novosellë ndaluan dy automjete të dyshuara, të cilat transportonin 2,475 kilogramë manaferra pa dokumentacion të rregullt që vërtetonte prejardhjen e tyre.
Si rezultat, është iniciuar rasti për “Kundërvajtje Doganore” dhe malli i sekuestruar është dorëzuar për vlerësim dhe procedim nga Dogana e Kosovës.
Policia e Kosovës thekson se do të vazhdojë me masa të rrepta për parandalimin dhe luftimin e kontrabandës, duke bashkëpunuar ngushtë me institucionet përkatëse për të siguruar rendin dhe sigurinë ekonomike në vend.
