Kryetari i Odës Ekonomike të Kosovës (OEK), Lulzim Rafuna, priti sot ambasadorin e Bullgarisë në Kosovë, Hristo Kraevski, ku diskutuan për forcimin e bashkëpunimit ekonomik ndërmjet Kosovës dhe Bullgarisë.
Sipas njoftimit, ata diskutuan edhe mundësitë për rritjen e tregtisë dhe investimeve, si dhe mënyrat për të thelluar bashkëpunimin në sektorë të ndryshëm ekonomik.
“Ambasadori Kraevski theksoi rëndësinë e një integrimi më të madh të dy vendeve në nivele të ndryshme dhe shprehu gatishmërinë e Bullgarisë për të mbështetur iniciativat që promovojnë zhvillimin ekonomik në Kosovë.
Ndërsa kryetari Rafuna theksoi se OEK-u është e angazhuar për forcimin e marrëdhënieve ekonomike ndërmjet dy vendeve dhe për promovimin e mundësive të reja për bizneset kosovare, duke ofruar gjithashtu mbështetje për një infrastrukturë më të fortë që nxit investimet”, thuhet në njoftim .
Tutje, theksohet se ky takim ka shërbyer si një hap i rëndësishëm për thellimin e bashkëpunimit mes dy vendeve, duke hapur mundësi për projekte të përbashkëta që do të kontribuojnë në rritjen e zhvillimit ekonomik dhe përmirësimin e kushteve për biznes.