Duda Balje nga Bashkimi Social Demokrat (SDU) ka deklaruar se nuk i ka dhënë konfirmim kryeministrit në detyrë, Albin Kurti, nëse do ta mbështesë apo jo për mandatin e tretë.
Balje pas takimit me Kurtin tha se kërkesat e tyre janë krijimi i një komune boshnjake, reforma në arsim dhe tretmani i barabartë me të gjitha partitë e tjera që kanë nga një deputet.
“Sot kemi pasur takimin e parë. I parashtrova kërkesat që kemi si boshnjakë. Nuk kemi marrë konfirmim dhe nuk kemi dhënë asnjë konfirmim. Është takimi i parë dhe jemi në fazën e bisedimeve”, tha ajo.
Tutje, Balje tha se ende nuk e kanë caktuar takimin e radhës, teksa konfirmoi se ka biseduar edhe me partitë opozitare.
Kurti të mërkurën është takuar me kryetaren e Partisë së Re Demokratike (NDS) nga komuniteti boshnjak, njëherësh zëvendëskryeministre në detyrë, Emilija Rexhepi dhe me kryetarin e Partisë për Liri, Drejtësi dhe Mbijetesë nga komuniteti serb, njëherësh ministër në detyrë për Komunitete dhe Kthim, Nenad Rashiq.
Lëvizja Vetëvendosje thotë se mund t’i sigurojë 61 votat e nevojshme për formimin e qeverisë së re të Kosovës.
Ndërsa dy parti opozitare, LDK dhe AAK , kanë hedhur poshtë mundësinë e bashkëqeverisjes me LVV-në, kurse PDK dhe Nisma Socialdemokrate nuk kanë vendosur vija të kuqe për koalicione.
