Nënkryetarja e Partisë Demokratike të Kosovës, Vlora Çitaku, ka kritikuar kryeministrin në detyrë Albin Kurti për veprimet e tij, duke thënë se ai po shndërron zyrën e shtetit në zyrë partie dhe po përdor pushtetin për pazare politike prapa dyerve të mbyllura.
Çitaku ka theksuar se Kosova nuk është parti dhe se Kurti nuk është mbi ligjin dhe Kushtetutën. Ajo ka nënvizuar se Kryeministri po shkel ligjet dhe po përbuz traditat dhe parimet që dikur i mbrojti me pasion.
“Imagjinojeni sikur Hashim Thaçi, Isa Mustafa, Ramush Haradinaj, apo kushdo tjetër përpara Albin Kurtit të kishte bërë atë që po bën ai sot”, ka shkruar Çitaku.
Ajo ka thksuar se Kosova ka vuajtur për demokraci dhe se populli nuk është për t’u shndërruar në spektatorë të një partie.
“Ti nuk je mbi ligjin. Nuk je mbi Kushtetutën. Nuk je mbi dinjitetin e këtij populli që ka vuajtur për demokraci, jo për t’u shndërruar në spektatorë të një partie që kërkon të kontrollojë gjithçka”, ka shkruar Çitaku.