Zëvendëskryeministrja dhe ministrja e Punëve të Jashtme dhe Diasporës në detyrë, Donika Gërvalla, priti ambasadorin e ri të Bullgarisë në Kosovë, Hristo Kraevski, të cilin e uroi për fillimin e mandatit të tij. Ajo e riafirmoi angazhimin e Kosovës për thellimin e marrëdhënieve me Bullgarinë, një partner të rëndësishëm për Kosovën.
“Ministrja Gërvalla vlerësoi mbështetjen e vazhdueshme të Bullgarisë për Kosovën në rrugën e saj euroatlantike dhe theksoi nevojën për forcimin e bashkëpunimit mes dy vendeve, duke e cilësuar këtë bashkëpunim si thelbësor për sigurinë dhe stabilitetin rajonal”, thuhet në njoftimin e MPJD-së
Tutje theksohet se Bullgaria mbetet një partner i rëndësishëm i Kosovës në rajon. “Gjatë takimit, ministrja Gërvalla dhe ambasadori Kraevski diskutuan mbi zgjerimin e bashkëpunimit në fusha kyçe si ekonomia, siguria dhe inovacioni, duke e cilësuar këtë bashkëpunim si një investim të vlefshëm për të ardhmen e përbashkët të dy vendeve”, thuhet tutje në njoftim.