Ministri në detyrë i Financave, Hekuran Murati, ka reaguar pas kërkesës së presidentes Osmani për Qeverinë që të pezullojë tarifat ndaj produkteve me origjinë nga Shtetet e Bashkuara të Amerikës.
Ai ka deklaruar se kërkesa ishte dërguar në adresë të Qeverisë në orën 17:39, ndërkaq kjo u bë publike vetëm tre minuta më vonë, në rrjetin social X.
Murati ka theksuar se çështjet e tilla duhet të trajtohen larg mediave dhe publiku duhet të njoftohet vetëm pasi të merret një vendim. Ai ka shtuar se politikat fiskale bien në fushëveprimin e ekzekutivit, konkretisht në ministrinë përgjegjëse për financa. “Secili shtet serioz, këto çështje i trajton larg mediave, dhe publiku njoftohet kur të merret vendimi”, ka shkruar ai.
“Qysh në prill të vitit 2023, gjatë vizitës në Washington DC, bashkë me zëvendës kryeministrin Bislimi kemi takuar përfaqësues të Departamentit të Tregtisë, me të cilët kemi diskutuar ndër të tjera edhe temën e një marrëveshjeje për tregti të lirë me SHBA-të. Çështja e marrëveshjes për tregti të lirë është përsëritur nga kryeministri Kurti edhe në takimet që ka zhvilluar me ish ambasadorin amerikan Hovenier,” ka thënë Murati.
Ai ka theksuar se gatishmëria e Qeverisë së Kosovës për një tregti të lirë dhe pa barrierë tarifore ose jo-tarifore me SHBA-të mbetet e fortë.
“Gjatë ditës së djeshme, kemi diskutuar me kryeministrin në lidhje me implikimet e mundshme që ka vendimi i presidentit Trump për vendosjen e tarifave ndaj të gjitha shteteve me të cilat SHBA-të kanë raporte tregtare. Fatmirësisht, Kosova bën pjesë në grupin e shteteve që u është vendosur shkalla tarifore minimale prej 10%. Marrë parasysh edhe vëllimin e vogël tregtar që kemi, impakti financiar i pasjes apo jo të një regjimi tarifor ka ndikim të vogël në ekonominë tonë,” ka shtuar Murati.
Ai ka theksuar se Kosova mbështet plotësisht parimin e presidentit Trump për tregti të lirë dhe pa barriera dhe se synimi i Qeverisë është rritja e këmbimit tregtar me SHBA.
“Shfrytëzoj rastin përmes këtij postimi që të njoftoj presidenten, por edhe qytetarët, që si kabinet qeveritar ne veçse kemi qenë duke e shqyrtuar këtë temë. Dhe kurdo që merret një vendim patjetër që do t’ju njoftojmë me kohë,” ka theksuar ai.
