Këshilltarët e presidentit amerikan, Donald Trump, e kanë këshilluar atë të mos flasë apo të telefonojë me presidentin rus Vladimir Putin derisa Kremlini të bie dakord për një armëpushim në Ukrainë, raportoi NBC News, duke cituar dy zyrtarë anonimë.
Trump tha më 30 mars se ishte “shumë i zemëruar” me Putinin për mungesën e përparimit në negociata, por se ai planifikoi të fliste me të së shpejti. Hera e fundit që dy presidentët folën ishte më 18 mars, ndërsa bisedimet e paqes po zhvilloheshin në Arabinë Saudite për t’i dhënë fund luftës së Rusisë kundër Ukrainës.
Megjithëse Trump tha në fund të marsit se donte të telefononte Putinin së shpejti, telefonata nuk është planifikuar ende. Zyrtarët thonë se këshilltarët e tij e kundërshtojnë idenë derisa Putin të bie dakord për një armëpushim të plotë.
Moska ende nuk është dakord për një armëpushim
NBC shkruan gjithashtu se nuk përjashtohet që Trump të vendosë befas se dëshiron të flasë ende me presidentin rus, pavarësisht rekomandimeve të këshilltarëve.
Deri më tani, Rusia nuk ka treguar se është e gatshme t’i qaset seriozisht marrëveshjes së paqes. Në negociatat me Ukrainën dhe SHBA-në, autoritetet ruse parashtrojnë kërkesa maksimaliste për të cilat as Amerika dhe veçanërisht Ukraina nuk janë të gatshme t’i bien dakord.
Më 11 mars, Kievi pranoi propozimin amerikan për një armëpushim të plotë për 30 ditë dhe tha se është gati ta zbatojë menjëherë nëse Moska bie dakord. Por pala ruse e ka refuzuar deri më tani.
