Posta e Kosovës ka nisur shpërndarjen e gjobave digjitale për shkeljet e trafikut, një iniciativë që synon rritjen e sigurisë dhe përgjegjësisë në rrugë.
Sipas një komunikate të Postës, “Ky hap modernizues e bën procesin më të shpejtë dhe më të thjeshtë për qytetarët, duke siguruar një menaxhim efikas të detyrimeve të tyre.”
Gjobat do të dërgohen drejtpërdrejt në adresat e qytetarëve, duke ofruar mundësi më të përshtatshme dhe më të thjeshta për të realizuar pagesat. Sipas Postës së Kosovës, qytetarët mund të paguajnë gjobat në çdo zyrë postare të Postës së Kosovës, duke siguruar fleksibilitet dhe komoditet.
“Ky shërbim mbështet angazhimet e Policisë së Kosovës dhe të komunave për një trafik më të sigurt dhe një mjedis më të rregullt. Po ashtu, ky është një hap përpara në krijimin e një infrastrukture më të sigurt dhe më të besueshme për të gjithë qytetarët”, theksohet në njoftim.
