Në deklaratën e Ambasadës thuhet se Serbia “rrefuzon me vendosmëri çdo akuzë apo aludim” se vepron kundër paqes dhe stabilitetit në rajon dhe se mbetet e përkushtuar ndaj Marrëveshjes së Dejtonit, integritetit territorial të Bosnjë-Hercegovinës dhe parimeve të bashkëpunimit.
Mirëpo, këto pretendime vijnë në kontrast të thellë me veprimet e udhëheqjes shtetërore serbe, të mishëruara në presidentin Aleksandër Vuçiq, i cili e mbështeti hapur Dodik në daljet e shumta publike – madje edhe në momentet kur ai, nga pozita e presidentit të njësisë së RS-së, drejtoi sulme të drejtpërdrejta ndaj institucioneve të shtetit të BeH.
Ambasada thekson se Serbia “mbështet padiskutim integritetin territorial të Bosnjë-Hercegovinës”, por menjëherë thekson “rëndësinë e ruajtjes së të gjitha elementeve të Marrëveshjes së Dejtonit, duke përfshirë kompetencat kushtetuese të entiteteve dhe të drejtat e kombeve përbërës”. Ky formulim, në kontekstin e përpjekjeve të vazhdueshme të Dodikut për të minuar kompetencat e shtetit dhe për ta paraqitur entitetin e RS si një shtet pothuajse më vete, vetëm sa më tej hedh dyshime mbi synimet reale të Beogradit.Njoftimi i Komisionit të Helsinkit emërton qartë përgjegjësit: “Armiqësia e hapur e Dodikut ndaj rendit kushtetues të BeH u mundësua nga mbështetja e Rusisë dhe Serbisë dhe është e papajtueshme me të ardhmen e vendit si një anëtar i qëndrueshëm dhe i begatë i Bashkimit Evropian”. Në të njëjtën frymë, ata i bëjnë thirrje BE-së që të ndjekë shembullin e SHBA-ve dhe të sanksionojë Dodikun dhe bashkëpunëtorët e tij, si dhe paralajmërojnë Moskën dhe Beogradin që të përmbahen nga destabilizimi i mëtejshëm i rajonit.Megjithatë, në vend të vetë-reflektimit të ndershëm dhe të marrjes së përgjegjësisë për rolin që luan në tensionet rajonale, Ambasada serbe përpiqet të relativizojë situatën dhe ta zhvendosë fokusin në “keqinterpretimet” e Dejtonit dhe “nevoja për një qasje të balancuar”.
Është pikërisht ky “ekuilibër” që është më shqetësues – sepse ndërsa Beogradi po balancon mes deklaratave të paqes dhe mbështetjes konkrete për Dodikun, Bosnja dhe Hercegovina po përballet me krizën më të thellë politike që nga lufta.
