Në Tiranë do të hiqet taksa e ndërtimit të parkimeve. Lajmi është bërë i ditur nga kryeministri, Edi Rama, gjatë një takimi të shtunën në mbrëmje me shtabin elektoral të PS-së në Njësinë Nr.14 në Tiranë.
Në këtë takim Rama tha se zona e Njësisë 14, që përfshin Astirin, Unazën e Madhe deri në Kashar, ka nevojë për më shumë ndërhyrje dhe investime, pasi janë bërë shumë ndërtime dhe ka nevojë për ndërhyrje infrastrukturore dhe në shërbime publike.
Rama u ndal tek problematika e parkimeve në këtë zonë dhe në kryeqytet, teksa u shpreh se po punohet për një program në bashkëpunim me bashkinë dhe me Korporatën Shqiptare të Investimeve, (AIC) për të ndërtuar parkime nëntokësore dhe mbitokësore.
“Kjo zonë në fakt ka nevojë shumë për ndërhyrje se janë bërë shumë ndërtime dhe ka shumë nevojë për ndërhyrje në infrastrukturën e brendshme publike. Edhe çështja e parkimeve është problem dhe po bëjmë një program tani të kombinuar edhe me bashkinë edhe me AIC-në, sepse ka copëza shtet tek-tuk që mund të bëhen një sistem parkimesh publike nën dhe mbitokësor dhe mund të jenë godina të bukura ato se mund të jenë si simbole arkitektonike edhe të mund të lehtësohet kjo çështja e makinave se do shkojë duke u rënduar. Edhe në pjesë të caktuara të Tiranës është problem ai parkimi dysh dhe ngadalëson gjithë trafikun. Ndërkohë që do bëjmë dhe diçka tjetër që do t’ia heqim fare taksën e ndërtimit të parkimit. Nëse kalkulimi që është bërë deri më sot është bërë njësoj si ndërton dyqan, si ndërton apartament, ti paguan të njëjtën taksë, kjo edhe e tkurr ndërtuesin tek llogaria. Nëse ia heqim taksën e parkimit, dhe do ta heqim, atëherë thjesht do të ketë koston e vetë, por s’do ketë një kosto ekstra me taksa dhe do jenë të nxitur të bëjnë më shumë parkime nëntokësore. Parkimet do të jenë gjithmonë e më shumë fitimprurëse, duhet ta nxisim këtë gjë. Po bëjmë një plan shumë të bukur bashkë me bashkinë dhe AIC-në dhe do shtyjmë në këtë drejtim”, tha Rama në takimin me shtabin elektoral të PS-së në Njësinë Nr.14 në Tiranë.
Në këtë takim merrte pjesë edhe drejtuesja politike e Qarkut të Tiranës, njëkohësisht edhe ministre e Arsimit, Ogerta Manastirliu, e cila u shpreh se “struktura është e konsoliduar dhe tani është fokusi në terren”. Ndërsa deputeti socialist, Plarent Ndreca, nënvizoi se “kjo zonë ka një specifikë në raport me zonat e tjera duke qenë se ka një zhvillim dinamik të fortë edhe për partinë ka një lëvizje të shpejtë të organizatave. Ne kemi një organizatë në 22 fraksione, këtu punojnë 360 anëtarë për 22 mijë zgjedhës”.
