Delegacionet e Kosovës dhe Serbisë gjatë muajit prill pritet të mblidhen në Bruksel në kuadër të Komisionit të Përbashkët për të Pagjeturit. Kështu ka bërë të ditur për RTK-në kryesuesi i Komisionit Qeveritar për Personat e Zhdukur, Andin Hoti. Në bazë të termave të referencës, Komisionet e Përbashkëta për të Pagjeturit do të duhej të takoheshin një herë në muaj brenda gjashtëmujorit të parë. Por një takim i këtillë ende nuk është mbajtur, ndonëse jemi në muajin e katërt.
Bashkimi Evropian, gjatë këtij muaji, më në fund pritet t’i ulë ballë për ballë delegacionet e Kosovës dhe të Serbisë për të diskutuar rreth fatit të personave të pagjetur nga lufta e fundit në vend.
Ndonëse termat e referencës së Komisionit të Përbashkët për të Pagjeturit thonë qartë se përfaqësuesit e të dyja palëve duhet të takohen një herë në muaj, në gjashtëmujorin e parë, një gjë e tillë nuk ka ndodhur për katër muaj.
RTK ka kërkuar për këtë informacione nga Bashkimi Evropian, por ata nuk janë përgjigjur.
Megjithatë, nga Komisioni Qeveritar për Personat e Zhdukur deklarojnë se shumë shpejt pritet të mbahet takimi i parë në Bruksel.
Andin Hoti thotë se për këtë çështje kanë zhvilluar komunikim më të shpeshtë me emisarin e BE-së për dialogun Kosovë-Serbi, Sorensen.
“Ditëve të fundit ka qenë një komunikim i Qeverisë me Sorensen, dhe në atë komunikim është diskutuar që të mbahet shumë shpejt takimi i ardhshëm dhe unë besoj që nuk do të kalojnë më shumë se 10 ditë deri në mbajtjen e takimit të thirrur nga Sorensen”, tha Andin Hoti, kryesues i KQPZH-së.
Hoti thotë se në këtë takim do të kërkojnë qasje për gërmime në lokacione të dyshuara për varreza masive në Serbi.
“Për momentin është bllokuar komplet dhe nuk ka qasje në territorin e Serbisë për gërmime ose informacione për varreza masive, prandaj po shpresojmë që takimi i Komisionit të Përbashkët të gjejë një zgjidhje për këtë çështje”, pohoi ai.
Në këtë pikë, nga Këshilli Koordinues për të Zhdukurit dhe Krimet e Luftës thonë se i tërë presioni i BE-së duhet të jetë mbi Serbinë.
Ahmet Grajqevci, kryetari i Këshillit Koordinues për të Zhdukurit dhe Krimet e Luftës, theksoi se nëse dëshiron BE, edhe Bashkësia Ndërkombëtare shumë shpejt do të zgjidhte këtë problem, sepse çdo vend në Serbi, ne e dimë ku janë varrezat masive, pavarësisht që Serbia e di më mirë se ne.
Para një muaji, Qeveria e Kosovës i ka dërguar një letër përfaqësueses së lartë për Punë të Jashtme dhe Politikë të BE-së, Kaja Kallas, për të marrë hapa konkretë që e detyrojnë Serbinë të hapë arkivat shtetërore.
