Statusi ligjor i miliona refugjatëve ukrainas në Bashkimin Evropian mund të kërcënohet pasi nuk ka një plan të qartë për t’i lejuar ata të qëndrojnë në BE pas arritjes së armëpushimit ndërmjet Ukrainës dhe Rusisë, shkruan sot Euraktiv.
Sipas raporteve, që nga sulmi rus në Ukrainë në shkurt 2022, Direktiva e Mbrojtjes së Përkohshme të BE-së (TPD) ka qenë një rrugë shpëtimi ligjore për pothuajse 4.3 milionë refugjatë ukrainas, pasi u dha atyre të drejtën për të qëndruar dhe punuar në vendet e BE-së.
Numri më i madh i refugjatëve u vendosën në Gjermani, Poloni, Republikën Çeke dhe Sllovaki.
