Prokuroria Themelore në Gjakovë ka kërkuar 30 ditë paraburgim për katër serbët e arrestuar.
Prokuroria njofton se ka marrë aktvendim për fillimin e hetimeve dhe se ka paraqitur kërkesë në Gjykatën Themelore në Gjakovë, për caktimin e masës së paraburgimit në kohëzgjatje prej një muaji për të dyshuarit.
Sipas kërkesës së Prokurorisë, ekziston dyshimi se të pandehurit, të nacionalitetit serb, kanë kryer veprën penale `Mbajtje në pronësi, kontroll ose posedim të paautorizuar të armëve`.
“Sipas kërkesës së Prokurorisë, ndër të tjera ceket se ekziston dyshimi i bazuar se të
pandehurit me inicialet B.R., N.V., P.K., M.S., të nacionalitetit serb, me datë
05.04.2025, në Rr. “Gasper Karaqi” në Gjakovë, të pandehurit në bashkëkryerje e duke
vepruar në kundërshtim me ligjin për armët Nr. 05/L-022, neni 2 pika 1.24, posedojnë
armë të ftohta, dhe atë një (1) sopatë, një (1) thikë me këllëf, dhe një (1) thikë sharrë,
në atë mënyrë që pas ndalimit nga ana e zyrtarëve policor për shkak se të njëjtit me
automjetin e llojit Toyota ngjyrë hiri, i cili drejtohej nga i pandehuri B.R., kishte tejkaluar
shpejtësisë në zonën e kufizuar të shpejtësisë dhe pasi ngasësi i veturës gjatë
procedimit të rregullt është pyetur nga zyrtarët policor se a posedon diçka ilegale në
veturë i njëjti ishte përgjigjur se nuk ka diçka të jashtëligjshme me vete, ku edhe kishte
shprehur dëshirën për kontroll të veturës dhe pas një kontrolle të veturës nga ana e
zyrtarëve policor janë gjetur mjetet e mprehta të cekura me lartë, ku te njëjtat të
pandehurit i kanë mbajtur gjatë vizitës në mënyrë të organizuar në disa nga Manastiret
Ortodokse në Republikën e Kosovës”, thuhet në njoftimin e kësaj prokurorie.
Policia e Kosovës dje ka ndaluar 16 persona, 4 në Gjakovë e 12 në Prizren. Nga 12 të arrestuarit në Prizren, 10 janë liruar në procedurë të rregullt.
