Një konferencë e planifikuar për shtyp mes Presidentit të SHBA Donald Trump dhe kryeministrit izraelit Benjamin Netanyahu pas takimit të tyre në Shtëpinë e Bardhë u anulua në mënyrë të papritur.
Një zyrtar i Shtëpisë së Bardhë njoftoi anulimin pa dhënë një arsye. Megjithatë, disa gazetarë u lejuan të merrnin pjesë në fillimin e takimit në Zyrën Ovale, sipas disa korrespondentëve.
Netanyahu mbërriti në Uashington në mes të luftës në Gaza dhe një armëpushimi të thyer, si dhe vendimit të Trump për të vendosur tarifa minimale prej 10 për qind mbi importet amerikane.
Trump u takua me Netanyahun në portat e Shtëpisë së Bardhë
Trump më parë priti Netanyahun në fillim të shkurtit, duke e bërë kryeministrin izraelit mysafirin e parë të huaj në mandatin e tij të dytë. Presidenti amerikan ka pritur sot Netanyahun duke i shtrënguar duart me të para Shtëpisë së Bardhë.
Para takimit, Netanyahu tha se synonte të diskutonte paketën e re tarifore të SHBA-së, përpjekjet për të siguruar lirimin e pengjeve të Hamasit në Rripin e Gazës dhe kërcënimin e paraqitur nga Irani.
Tarifat shtesë prej 17 për qind për produktet izraelite që vijnë në SHBA do të hyjnë në fuqi pasnesër. Sipas Wall Street Journal, Izraeli eksporton mallra me vlerë 22 miliardë dollarë në SHBA çdo vit.
