Ka shkuar në 61 numri i viktimave në tragjedinë e ndodhur javë më parë në Koçan të Maqedonisë së Veriut.
Ministri i Shëndetësisë, Arben Taravari, ka konfirmuar se ka vdekur 29-vjeçari Aleksandar Gavrillovski, i cili ishte për kurim në Lituani. Ai po ashtu ka bërë të ditur se edhe dy pacientë të tjerë janë në gjendje kritike për jetën, raportojnë mediat në Shkup.“Sot në ora 11:00, pacienti i dytë në Lituani, Aleksandar Gavrilovski, i cili ishte në gjendje kritike që nga fillimi, vdiq më 7 mars 1996 dhe ishte 29 vjeç”, tha Taravari në një deklaratë për gazetarët.
Ai shtoi se Gavrilovski është dërguar në Lituani më 17 mars nga Spitali i Përgjithshëm i Qytetit “8 Shtatori” në Shkup.
“Gjendja e tij ishte e rëndë që në fillim dhe nga 4 prilli u përkeqësua. Ai kishte djegie të shkallës së tretë në 35 për qind të trupit, si dhe djegie në rrugët e frymëmarrjes. Dje i është nënshtruar hemodializës dhe fatkeqësisht ka ndërruar jetë sot në orën 11 ” , tha ministri i Shëndetësisë së Maqedonisë së Veriut.
Më 4 prill në Lituani vdiq Aleksandar Karadakovski, i cili ishte viktima e 60-të e zjarrit në diskotekën “Puls” në Koçan.
Taravari tha se edhe dy pacientë të tjerë në gjendje kritike mbeten nën trajtim jashtë vendit, por, shtoi ai, janë në gjendje stabile.
Në qendrat shëndetësore jashtë vendit aktualisht janë 66 pacientë të lënduar nga zjarri në Koçan, ndërsa në spitalet në Shkup 10 pacientë, tha ministri i Shëndetësisë së Maqedonisë së Veriut, Arben Taravari.
61 persona humbën jetën dhe gati 200 u plagosën nga zjarri në diskotekën “Puls” në Koçan, një qytet në Maqedoninë e Veriut rreth 100 kilometra në lindje të Shkupit.
Zjarri ka rënë të dielën e datës 16 mars në orën 02:30 për shkak të përdorimit të mjeteve piroteknike në koncertin e grupit të ADN-së dhe sipas policisë në atë kohë në diskotekë kanë qenë rreth 500 vizitorë, raporton N1.
