Numri i të vdekurve nga tërmeti 7.7 ballë që goditi Mianmarin dhjetë ditë më parë është rritur në të paktën 3,515, me 210 persona ende të zhdukur, sipas shifrave të publikuara nga ushtria e Mianmarit të hënën.
Shumica e viktimave janë në dhe rreth Mandalay, qyteti i dytë më i madh i Mianmarit. Më shumë se 2100 njerëz vdiqën atje.
Vazhdimi i punës së shërbimeve të shpëtimit pengohet nga reshjet e dendura dhe erërat që dëmtuan çadrat dhe spitalet fushore të ekipeve ndërkombëtare. Meteorologët paralajmërojnë mundësinë e përmbytjeve dhe rrëshqitjeve të dheut për shkak të sezonit të ardhshëm të shirave.
Fundi i operacioneve të kërkim-shpëtimit
Autoritetet deklaruan përfundimin e operacioneve të kërkim-shpëtimit dhe e zhvendosën fokusin e tyre në rikuperimin dhe pastrimin e mbeturinave. Raportimet tregojnë se morgjet janë të mbipopulluara dhe djegiet masive po bëhen në ambient të hapur, raporton dpa.
Në shumë zona të prekura, erëra e keqe e kufomave është në ajër, duke e bërë të vështirë qëndrimin për punonjësit e ndihmës dhe banorët. Për shkak të tërmeteve të shumta të mëvonshme, disa banorë kanë frikë të kthehen në shtëpitë e tyre, ndaj flenë hapur.
Situatë katastrofike në disa pjesë të vendit
Krahas tërmeteve të reja, situatën e kërcënon edhe humbja e shpeshtë e internetit, e cila ndërpret komunikimin dhe koordinimin ajror.
Në disa pjesë të Mianmarit, situata është katastrofike. Gazeta Irrawaddy raporton se më shumë se 80 për qind e infrastrukturës së qytetit Sagaing është shkatërruar.
Situata humanitare mbetet e vështirë, kryesisht për grupet vulnerabël në atë vend të prekur nga konfliktet e brendshme.
