Në Prishtinë është hapur edicioni i katërt i panairit Ndërkombëtar të Turizmit “Kosova 2025”, që synon promovimin e Kosovës si një destinacion me potencial turistik dhe forcimin e bashkëpunimi ndërkombëtar në këtë sektor.
Ne hapje të panairit kanë marrë pjesë edhe ministrja në detyrë e Industrisë, Ndërmarrësisë dhe Tregtisë Rozeta Hajdari.
“Panairi si një platformë që bashkon liderët për të fuqizuar sektorin e turizmit, si një shtyllë kyçe e zhvillimit ekonomik dhe ruajtjen e trashëgimisë kulturore. Vetëm në këtë mandat kemi rritje prej 50 për qind të numrit të turistëve krahasim me vitet 2017-2020”, theksoi ajo.
Panairi u organizua nga Unioni i Turizmit i Kosovës, me mbështetjen e Ministrisë së Industrisë, Ndërmarrësisë dhe Tregtisë (MINT) dhe nën përkujdesjen e Komunës së Prishtinës.
“Është ndër që kemi arritur deri këtu që është një hap i rëndësishëm, filluam me 60 kompani dhe sot kemi mbi 340 kompani nga 16 shtete nga e gjithë bota. Turizmin e përmbyllëm vitin e kaluar me një rritje prej 36.8 për qind në raport me vitin e kaluar. Po punojmë bashkë me gjithë aktorët dhe partnerët tanë ndërkombëtar, që edhe viti 2025 të jetë vit i suksesit për Kosovën”, ka thëne kryetari i Unionit të Turizmit të Kosovës, Baki Hoti.
Ndërkaq, kryetari i Komunës së Prishtinës, Përparim Rama shtoi se edhe kryeqyteti e sheh turizmin si një mundësi që synon ofrimin e një mjedisi të favorshëm për turistë.
