Një krim i ndodhur gati tre dekada më parë mbetet i pazbardhur dhe tashmë vajza e viktimës po bën thirrje publike për ndihmë.
Janet Brown, një 51-vjeçare, nënë e tre fëmijëve, u vra brutalisht më 10 prill 1995, në shtëpinë e saj në Radnage, Buckinghamshire, Angli. Vrasësi i saj nuk u gjet kurrë.
Policia ka një mostër të ADN-së të gjetur në vendin e krimit, e cila besojnë se i përket vrasësit, por nuk përputhet me asnjë person në bazën e të dhënave të policisë. Më shumë se 1000 burra u morën në pyetje gjatë hetimit, por të gjithë u përjashtuan nga hetimi.
Një shpërblim prej 20,000 £ ofrohet për informacionin që çon në arrestimin dhe dënimin e autorit, dhe kushdo që ka informacion mund të kontaktojë në mënyrë anonime me Crimestoppers.
Rrethanat e vrasjes mizore
Janet Brown punoi si studiuese mjekësore në Spitalin John Radcliffe në Oksford. Ajo u gjet e zhveshur, me pranga dhe një fashë në gojë, në fund të shkallëve, gjithçka ishte e mbushur me gjak. Pavarësisht rrethanave, policia nuk beson se motivi ka qenë seksual dhe nga shtëpia nuk është vjedhur asgjë.
Vajza e saj e madhe, Zara Harden, thotë se ende nuk mund ta kuptojë pse dikush do të sulmonte nënën e saj: “Është krejtësisht e pakuptueshme për mua, por jam e bindur se dikush di diçka”, tha ajo.
“Ajo ishte lidhur dhe rrahur brutalisht, fjalë për fjalë e rrahën për vdekje. Nuk ka rëndësi nëse dikush nuk doli atëherë, ende nuk është vonë,” tha ajo.
Në kohën e vrasjes, fëmijët e Janet Brown, Zara, Benedikti dhe Roksan, nuk ishin në shtëpi dhe bashkëshorti i saj, Dr. Graham Brown ishte në një udhëtim pune në Zvicër.
Vrasësi fillimisht tentoi të priste xhamin e dyerve të dyfishta rrëshqitëse, më pas theu xhamin dhe u fut me forcë në shtëpi. Besohet se Xhenet u vra midis orës 20:15 dhe 22:15 atë mbrëmje. Trupi i pajetë u gjet të nesërmen në mëngjes nga një punëtor ndërtimi i cili supozohej se do të punonte në shtëpi me djalin e tij.
Apel për informacione të reja
“Vrasësi ose vrasësit kanë mbetur të pandëshkuar deri më sot. Ne duam që ata të ndiqen penalisht. Dikush i aftë për këtë lloj krimi është ende i lirë dhe ne duam të parandalojmë që diçka e tillë të ndodhë përsëri,” tha Harden.
Peter Beirne, kreu i ekipit të rishikimit të krimeve të rënda të pazgjidhura të policisë së Thames Valley, tha: “Unë ende besoj se ka njerëz që kanë informacion ose dyshime në lidhje me këtë vrasje brutale”.
“Ne kemi një profil të ADN-së nga vendi i krimit. Ai nuk i përket anëtarëve të familjes dhe besojmë se mund të jetë prova kryesore që lidh vrasësin me krimin,” tha Beirne.
