Shkruan: Florim ZEQA
Gjendja mjeruese në 30 objektet e Kazermës “Adem Jashari” në Prishtinë në radhë të parë e paraqet fytyrën e shtetit, pastaj organogramin e keq të menaxhimit të Kazermës namëmadhe “Adem Jashari” në Prishtinë.
Alarm për institucionet e shtetit
Publikimi i pamjeve të tualeteve në lajmet qendrore të mbrëmjes që përkojnë me kohen e ngrënies së darkës në familjet tona, përveçse lëshim mediatik, ishte pak më tepër se kaq, ishte shqetësuese dhe irrituese, e gërditshme dhe e neveritshme për qytetarët e Kosovës!
Mirëmbajtja brenda hapësirave përreth dhe brenda Kazermës së një ushtrie është dhe duhet të jetë në radhë të parë detyrë e ushtarëve dhe përgjegjësi e stafit komandues, duke përfshirë ministrin e FSK-së.
Në traditen patriarkale të familjeve shqiptare mirëmbajtja e oborrit dhe pastërtia e tualeteve (nevojtoreve) e ka shpërfaqë nivelin kulturor të familjes dhe zbardhjen e fytyrës së kryefamiljarit.
Bazuar në këtë maksimë popullore, pamjet e tualeteve në brendi të Kazermës “Adem Jashari”, e shpërfaqen keq zinxhirin komandues deri tek ushtari i fundit, por, për më keq se kaq, e ka shpërfaqë edhe fytyrën e shtetit të Kosovës përballë qytetarëve të vendit, të cilët e duan dhe respektojnë Ushtrinë e shtetit të tyre.
Pas pamjeve mjeruese në brendinë e Kazermës kryesore në vend, nuk e besojë që ka qytetarë të vendit që e kanë ndierë vetën mirë, me përjashtim të armiqve të Kosovës!
Mosfunksionimi i zinxhirit komandues, shkaktar i problemeve
Ata që e kanë përfunduar shërbimin ushtarak në ish armatën jugosllave e dinë mirë rolin e “Çatës”, i cili ishte një emër jo zyrtar ushtarak i cili merrej me punë administrative në Kazermë, siç janë: caktimi i ushtarëve për pastrimin e ambienteve të jashtme (oborrit dhe fushave sportive) dhe atyre të brendshme të Kazermës siç janë tualetet, dhomat e fjetjes, korridoret, shkallët, zyrat e oficerëve të lartë, lëshimin e lejeve të ushtarëve për dalje në qytet si dhe shpërndarjen letrave që u vinin ushtarëve nga familjarët e tyre.
Kur jemi në këtë segment, Mensa e Ushqimit në Kazermë ishte e menaxhuar kryesisht nga ushtarët dhe me kuzhinierë profesionist nga jashtë që paguheshin nga shteti
Me siguri edhe në Ushtrinë e Kosovës (FSK), sipas organogramit do duhej të ishte një ‘Çatë’ që merret me punët administrative të secilës Kazermë në Kosovë!
Mirëpo fatkeqësisht, aspektet e sipër cekura të higjienës dhe ushqimit në Kazermat e FSK-së deri më tani janë bërë përmes kompanive tenderuese, përmes të cilave përfitojnë të mëdhenjtë në pushtet përmes aferave korruptive të tenderëve një burimor, të cilëve kur nuk u shkojnë punët mirë, e ndërprenë furnizimin e ushtarëve me ushqim dhe veshmbathje, me pastrim të objekteve nga brenda, përfshirë tualetet që duhet të pastrohen dhe mirëmbahen në baza ditore.
Nuk është turp për secilin ushtarë të FSK-së nëse një herë një muaj apo në dy muaj e pastron tualetin në Kazermën të cilës i shërben dhe paguhet nga shteti.
Përfundimisht duhet të ndryshoj organogrami i menaxhimit të Kazermave të FSK-së, filluar nga ushqimi, veshmbathja, pastrimi dhe aspektet e tjera higjienike-sanitare të cilat duhet të jenë nën kontrollin e plotë të stafit menaxhues të FSK-së dhe të paguara drejtpërdrejt nga buxheti i shtetit e jo përmes tenderomanisë fitimprurëse të oligarkëve të lidhur me pushtetin.
