Përveç kësaj, Witkoff tha në disa intervista se Rusia duhet të përmbushë të gjitha kërkesat, duke përfshirë aneksimin e katër rajoneve të Ukrainës dhe ndalimin e hyrjes së Ukrainës në NATO.
Për shkak të kësaj, siç shkruan Reuters, shumë anëtarë të Partisë Republikane telefonuan në panik Sekretarin e Shtetit të SHBA, Marco Rubio, të shqetësuar për pikëpamjet dhe qëndrimin e Witkoff ndaj Putinit.
Bashkëpunëtorët e Trump tashmë e kanë kritikuar Witkoff-in dhe i pari mes tyre është gjenerali Keith Kellogg, i dërguari i SHBA-së në Ukrainë, roli i të cilit, sipas mediave amerikane, u zvogëlua për shkak të “pozicioneve tepër pro-ukrainase” që nuk i pëlqenin Kremlinit.
Kellogg tha në takimin me Trump se disa detaje që lidhen me territoret e pushtuara mund të negociohen, por se ato nuk duhet t’i lihen vetëm Rusisë. Megjithatë, presidenti amerikan nuk e ndryshoi politikën e tij dhe e dërgoi Witkoff në Moskë.
Përveç kësaj, Witkoff bëri gjithashtu një gabim të madh sigurie, duke ftuar në shtëpinë e tij Kirill Dmitriev, personin që Putin dërgoi në Uashington për të negociuar në emër të Rusisë.
Udhëheqësve amerikanë u janë dhënë udhëzime të qarta që të mos ftojnë zyrtarët rusë në shtëpitë e tyre, duke pasur parasysh shqetësimet e sigurisë që mund të lindin nga vizitat e tyre.
Megjithatë, nuk janë vetëm republikanët ata që shqetësohen për Witkoff dhe mbështetjen që ai gëzon në Shtëpinë e Bardhë. E njëjta gjë vlen edhe për aleatët amerikanë në mbarë botën, por veçanërisht në Evropë.
Zyrtarët evropianë janë të shqetësuar për qasjen e Witkoff ndaj Putinit dhe besojnë se, sipas Reuters, Rusia po përdor “naivitetin dhe papërvojën” e Trump në politikën e jashtme për të përmbushur kërkesat e saj, të cilat janë në përputhje me deklaratat e Witkoff.
Edhe donatorët e pasur të Trump janë kundër qasjes së Witkoff, dhe njëri prej tyre, Eric Levine, madje kërkoi që ai të largohej nga pozicioni i tij dhe Marco Rubio të drejtonte negociatat.
Pavarësisht kësaj, Trump ende i beson Witkoff-it, të cilin e dërgoi gjithashtu në Iran për të negociuar një marrëveshje bërthamore me këtë vend.
Shkak për këtë besim, shkruan Reuters, është fakti se Witkoff udhëhoqi bisedimet e paqes mes Izraelit dhe grupit palestinez Hamas. Besimi nuk u lëkund nga fakti që Izraeli shkeli armëpushimin dhe, në vend të fazës së dytë, nisi sulme të reja në Rripin e Gazës.
