Një çerdhe me bazë në komunitet në lagjen ‘Mati 2’ në Prishtinë po dyshohet për mashtrim me subvencione nga Komuna e Prishtinës, ku prindërit po ankohen se dikush tjetër përfitoi në emër të fëmijëve të tyre. Ky rast po hetohet edhe nga organet e drejtësisë.
Një ndër çerdhet më të njohura në lagjen ‘Mati 2’ në Prishtinë që është me bazë në komunitet, po dyshohet për një skandal financiar.
Prindër të fëmijëve që ndjekin çerdhen ‘Botanika’ kanë ngritur alarmin për keqpërdorim të subvencioneve komunale, duke deklaruar se, ndonëse kanë paguar çmimin e plotë për shërbimet, emrat e fëmijëve të tyre figurojnë në listat e përfituesve të ndihmës financiare nga Komuna e Prishtinës. Njëri nga prindërit, në kushte anonimiteti, ka dhënë më shumë detaje mbi rastin.
“Janë dërguar lista në komunë në emër tonin si prind për fëmijët tanë dhe është marrë subvencion. Para një viti ka filluar dyshimi, mirëpo nuk janë ndërmarr masa. Pas shumë hapave që janë ndërmarr prej prindërve, drejtoresha i ka kërkuar listat prej komune dhe e ka pa që ka prind që marrin subvencione pa aplikuar fare vet”, tha një prind anonim.
RTK ka pyetur edhe drejtoreshën e kopshtit ‘Botanika’ lidhur me akuzat ndaj këtij institucioni , Kadrije Asllani po ajo nuk ka pranuar të deklarohet para kamerave, por ka thënë se këtë punë ia ka lënë drejtësisë.
Kurse nga Drejtoria e Arsimit në Prishtinës deklaruan se Komuna ka ndërmarrë masat e nevojshme duke kërkuar realizimin e një auditimi të jashtëzakonshëm, për të cilin thonë se është në proces.
Rasti po hetohet edhe nga organet e rendit.
“Ju njoftojmë, se me datën 12.03.2025 Prokurori i shtetit ka autorizuar Policinë e Kosovës/Njësinë e hetimeve të krimeve ekonomike dhe korrupsionit në Prishtinë, për ndërmarrjen e të gjitha masave dhe veprimeve hetimore mbi këtë çështje”, thuhet në njoftimin e organeve të rendit.
Prokuroria njofton se do të informojë brenda suazave ligjore lidhur me ecurinë e kësaj çështjeje penale juridike.
