Presidentja e Republikës së Kosovës, Vjosa Osmani, ka pranuar sot letrat kredenciale nga ambasadori i ri i Malit të Zi në Kosovë, Bernard Çobaj.
Gjatë ceremonisë zyrtare të dorëzimit të kredencialeve, Presidentja Osmani i uroi mirëseardhje ambasadorit Çobaj dhe i dëshiroi sukses në detyrën e tij të re diplomatike, njofton Presidenca.
Ajo ka theksuar rëndësinë e ruajtjes dhe zhvillimit të marrëdhënieve të mira fqinjësore ndërmjet Kosovës dhe Malit të Zi, të ndërtuara mbi parime të respektit dhe bashkëpunimit të ndërsjellë.
Osmani ka vlerësuar mbështetjen që Mali i Zi i ka dhënë Kosovës gjatë periudhave të rëndësishme shtetformuese dhe ndërkombëtare, duke nënvizuar domosdoshmërinë e thellimit të mëtejshëm të bashkëpunimit në fusha me interes të përbashkët.
“Institucionet e Kosovës mbeten të përkushtuara për avancimin e bashkëpunimit me Malin e Zi në frymën e fqinjësisë së mirë, stabilitetit rajonal dhe synimit të përbashkët për integrim euroatlantik,” ka thënë Osmani.
Ajo gjithashtu ka shprehur bindjen se gjatë mandatit të ambasadorit Çobaj do të hapen mundësi të reja për bashkëpunim, duke forcuar më tej marrëdhëniet mes dy shteteve fqinje.
