Sot në Vushtrri do të mbahet një organizim solemn për nder të krijimtarisë së fotografit, poetit dhe shkrimtarit të njohur Nesim Ispahiu, me rastin e 80-vjetorit të veprimtarisë së tij artistike dhe 90-vjetorit të lindjes.
Të ftuar në programin e mëngjesit në RTK për të folur rreth këtij jubileu ishin Filiz Pasoma Muzaqi, sekretare e Institutit Yunus Emre, Izet Miftari, drejtor i Drejtorisë së Kulturës në Komunën e Vushtrrisë dhe vetë Nesim Ispahiu.
“Ne sot jemi mbledhur për ta kremtuar këtë moment të veçantë për fotografin, poetin dhe shkrimtarin Nesim Ispahiu. Hapja e programit do të bëhet sot në orën 14:00, ku do të shfaqet një dokumentar i shkurtër për jetën dhe veprën e tij, do të mbahet një panel diskutimi, si dhe promovimi i librit të tij ‘Shija e Vargut’, i cili është përkthyer në gjuhën turke. Po ashtu do të hapet edhe ekspozita personale me 40 fotografi të përzgjedhura që reflektojnë krijimtarinë e tij,” u shpreh Filiz Pasoma Muzaqi.
Ndërkohë, Izet Miftari theksoi rëndësinë historike të figurës së Ispahiut për qytetin e Vushtrrisë:
“Është e vështirë të shpjegohet në pak minuta një krijimtari kaq e madhe. Nga perspektiva e historianit, unë e quaj Nesimin ‘Marubi i Vushtrrisë’, sepse çdo fotografi që lidhet me këtë qytet nga vitet ’50 deri në ’80, mban gjurmët e tij. Ai është një pasuri e vërtetë për historinë vizuale të qytetit tonë dhe ne si institucion e ndjejmë detyrim ta nderojmë në këtë përvjetor të dyfishtë.”
Vetë Ispahiu, i emocionuar, u shpreh mirënjohës për nderimin dhe vlerësimin që po i bëhet.
“Jam i lumtur që kam arritur t’i jap diçka këtij qyteti dhe të lë një gjurmë historike. Vushtrria është një qytet i vjetër dhe me rëndësi për historinë e Kosovës, por shpesh nuk përmendet sa duhet. Ndihem krenar për përkthimin e librit, falënderoj zonjën Filiz dhe të gjithë për këtë”, tha ai.
