Ministri në detyrë i Financave Hekuran Murati, komentoi situatën e krijuar pas dështimit të seancës për djeshme për konstituimin e Kuvendit të Kosovës.
Çeku në konferencë për media pas mbledhjes së qeverisë në detyrë tha se si do të shkohet tutje pritet që të shihet, sepse një gjë e tillë nuk ka ndodhur më herët.
“Ju ishit dëshmitarë të asaj që ndodhi ditën e djeshme. Shumica e Kuvendit ka votuar kundër. Kjo nënkupton refuzim të pranimit të rezultatit të certifikuar të KQZ-së. Si do të shkohet tutje pritet që të shihet. Mendoj që tani jemi në territor të pashkelur, sepse një gjë e tillë nuk ka ndodhur më herët. A i bind kjo që deputetët që kanë votuar kundër duhet të tërhiqen dhe të lirojnë vendin. Synimi ynë është se jemi të përkushtuar që vendi të ketë institucionet e veta dhe të ketë një legjitimitet derisa të votohet Qeveria Kurti III. Sa i përket deputetëve të komuniteteve joshumicë, votimi i djeshëm paraqet vetëm vullnetin e kuvendit si tërësi të 120 deputetëve se a e pranojnë rezultatin zgjedhor të certifikuar nga KQZ. Fatkeqësisht dje pamë që disponimi ishte që si tërësi Kuvendi ta refuzojë një gjë të tillë”, tha Murati.
Sipas tij, votimi i djeshëm ka qenë i procedurës formale. Ishte si hap drejt konstituimit të Kuvendit. Nuk ka qenë paraqitje e mbështetjes.
Ai ka thënë se me kalimin e mandatit katërvjeçar të Kuvendit, automatikisht edhe kabinetit qeveritar i kalon mandati, derisa shtoi se dorëheqja ishte e vetëkuptueshme.
Murati shtoi se dorëheqja do të ishte efektive nëse certifikimi i zgjedhjeve do të kryhej para 23 marsit, kur Qeverisë i ka mbaruar mandati.
“Dorëheqja si akt i konsumuar me vetë përfundimin e mandatit, më 23 mars. Neni 26 i ligjit do të hynte në funksion në rastin kur, zgjedhjet u mbanë më 9 shkurt, e KQZ-ja të ishte më efektive në numërim dhe certifikimi të bëhej më 20 mars. Më 20 mars, Qeveria ka qenë në mandat dhe do të duhej të jepte dorëheqje, e pas 23 marsit dorëheqja është e vetëkuptuar. Pra deri në Qeverinë Kurti 3 do të ketë Qeveri Kurti 2, se nuk mund të ketë vakum institucional”, tha ministri në detyrë.
Murati, tutje deklaroi se meqenëse ende s’është konstituar Kuvendi, do të vazhdojë të marrë pagën e ministrit, këtë deklarim e bëri në kuadër të pyetjes nga gazetarët se si do të paguhet në fund të muajit, si deputet apo si ministër, duke pasur parasysh se kabineti i Kurtit ka dhënë dorëheqje.
Murati ka thënë se pagat beson se do t’i marrin si qeveri në detyrë përderisa e kryejnë këtë funksion.
Kurse sa i përket rritjes së të tarifave të energjisë, ai tha se ka ndikuar kostot operacionale të cilat i miraton ZRRE dhe çmimi i furnizimit nga importi.
