Në mbledhjen e sotme të ZRRE-së është aprovuar shtrenjtimi i rrymës prej 16.1 për qind. Zyra e Rregullatorit për Energji (ZRRE) me pesë vota për dhe as një kundër ka miratuar tarifat e reja.
Kryesuesi i Bordit të ZRRE-së, Ymer Fejzullahu ka bërë të ditur se nga 1 maji i këtij viti qytetarët do të paguajnë rrymën me shtrenjtim prej 16.1%. Po ashtu ai tha se rritja është për të gjitha kategoritë e konsumatorëve.
“Me pesë vota për, konstatoj se aprovohen tarifat për konsumatorët universal me shërbim universal, sic janë të përcaktuara kriteret në legjislacionin primar, të gjithë konsumatorët që kanë të drejtë të furnizohen me tarifa me shërbim universal janë konsumatorët shtëpiakë familjarë dhe bizneset e vogla, më qarkullim më pak se 10 milionë euro dhe më pak se 50 punëtorë. Pra janë këto dy kategori që mund të furnizohen nga 1 maji, deri më 31 mars 2026”, ka thënë Fejzullahu.
Tarifat e reja do të vlejnë për faturat nga 1 maji.
