Ukraina njoftoi se sot se tre persona u vranë dhe 31 të tjerë u plagosën në një sulm rus me dronë në qytetin juglindor Dnipro.
“Një sulm masiv me UAV (mjete ajrore pa pilot) çoi në pasoja tragjike. Tre persona vdiqën në Dnipro, përfshirë një fëmijë”, thuhet në një deklaratë të publikuar në Telegram nga guvernatori i Dnipropetrovskit, Serhiy Lysak.
Lysak tha se sulmi i së mërkurës vonë la 31 persona të tjerë të plagosur, përfshirë 10 të shtruar në spital.
Ai shtoi se punëtorët komunalë ndodhen në vendin e sulmit dhe se policia dhe organizatat humanitare kanë ngritur tenda. “Të paktën 15 ndërtesa u dëmtuan, përfshirë konvikte studentore, institucione arsimore dhe fabrika të përpunimit të ushqimit”, tha gjithashtu në Telegram kryebashkiaku i Dnipros, Borys Filatov, , transmeton Anadolu.
DTEK-ja, një ofrues privat ukrainas i energjisë, tha në një deklaratë se ndërtesat dhe pajisjet në një nga vendet e saj të prodhimit në rajonin e Dnipropetrovskit janë dëmtuar rëndë. “Për fat të mirë, asnjë punonjës nuk u lëndua”, shtoi DTEK-ja.
Ndërkohë, Forcat Ajrore të Ukrainës pretenduan se mbrojtja ajrore e saj kapi 25 nga 75 dronë rusë, që kanë prekur rajonet Donetsk, Kharkiv, Sumy dhe Dnipropetrovsk gjatë sulmeve gjatë natës.
Presidenti ukrainas Volodymyr Zelenskyy përsëriti thirrjen e tij për të ushtruar më shumë presion ndaj Rusisë për t’i dhënë fund konfliktit dhe për të siguruar një paqe të qëndrueshme.
“Çdo paketë mbrojtëse nga partnerët tanë për Ukrainën tani, çdo formë e mbështetjes nga bota për qëndrueshmërinë tonë, është fjalë për fjalë mbrojtje e jetëve”, tha ai në X.
Po ashtu, kryeministri ukrainas Denys Shmyhal u bëri thirrje partnerëve të Kievit që të përgjigjen “me forcë dhe vendosmëri ndaj bombardimeve të përditshme të qyteteve ukrainase dhe vrasjeve të civilëve”. Autoritetet ruse nuk kanë komentuar menjëherë mbi sulmin.
