Katër persona kanë humbur jetën dhe një tjetër është lënduar rëndë pas rrëzimit të një teleferiku pranë qytetit Castellammare di Stabia, në Italinë jugore.
Ngjarja ndodhi pasi një kabllo e teleferikut që transportonte turistët drejt malit Faito, rreth tre kilometra larg qytetit, u këput, duke shkaktuar rrëzimin tragjik të një prej kabinave.
“Katër trupa të pajetë u gjetën, ndërsa personi i pestë i lënduar u shpëtua dhe u dërgua në spital”, konfirmoi departamenti i zjarrfikësve përmes një postimi në Telegram.
Sipas autoriteteve lokale, operacionet e shpëtimit u vështirësuan nga kushtet e pafavorshme atmosferike, përfshirë mjegullën e dendur dhe erërat e forta. Në vendngjarje ndërhynë mbi 50 zjarrfikës.
Një nga kabinat e teleferikut, me 16 pasagjerë në bord, ndodhej pranë qytetit dhe u vendos me sukses në tokë të sigurt.
Ndërkohë, kabina tjetër ishte e varur mbi një greminë në malin Faito, gjë që vonoi ndjeshëm ndërhyrjen e ekipeve të shpëtimit.
Teleferiku ishte rihapur vetëm dhjetë ditë më parë për sezonin veror. Prokuroria ka nisur hetimet për shkaqet e aksidentit.
“Teleferiku u rihap me të gjitha kushtet e kërkuara të sigurisë. Ajo që ndodhi është një tragjedi e paimagjinueshme dhe e paparashikueshme,” deklaroi Umberto de Gregorio, drejtues i kompanisë që menaxhon teleferikun.
Ngushëllimet për viktimat u shprehën edhe nga kryeministrja italiane Giorgia Meloni, përmes një deklarate të zyrës së saj.
Teleferiku funksionon që nga viti 1952. Aksidente të ngjashme kanë ndodhur më parë në Itali – në vitin 1960 një tjetër incident në të njëjtin teleferik la katër të vdekur, ndërsa në vitin 2021 një tjetër tragjedi në veriun e Italisë mori jetën e 14 personave.
