Shkruan: Florim ZEQA
Pas hedhjes së hapit të parë të verifikimit të mandateve, ju uroj nga zemra të gjithë të zgjedhurve të popullit postin e deputetit, jetëgjatësia politike e të cilëve varet nga Konstituivi i Kuvendit, përkatësisht nga zgjedhja e kryeministrit të ri!
Zgjedhjet e jashtëzakonshme, opsion real i daljes nga ngërçi politik
Dështimi dy herë radhazi i propozimit të LVV-së për zgjedhjen e znj. Albulena Haxhiu për kryetare të Kuvendit, e ka sjellë vendin në një nivel të ri të bllokadës politike!
Mbase është e vështirë të thuhet me saktësi, se edhe sa gjatë do të shkohet me këtë nivel të bllokadës politike, pasi paralajmërimi i Shefes së Grupit Parlamentar të LDK-së, znj. Hykmete Bajrami, se do të bëjë kallëzim penal, meqë nga data 27 mars 2025, në institucionet e Kosovës kanë marrë vendime qytetarët e thjeshtë dhe jo zyrtarët shtetërorë, përveq krizës parlamentare e ka hapur edhe një betejë ligjore, pa e përjashtuar Gjykatën Kushtetuese!
Në arsyetimet e zonjës Bajrami, anëtarët e Qeverisë që janë zgjedhur deputet, sipas Ligjit do të duhej të jepnin dorëheqje një ditë para certifikimit të rezultateve nga ana e KQZ-së.
Kjo i bie se, pavarësisht rezultateve të seancës konstituive të ditës së hënë, të 21 prillit 2025, deponimi i kallëzimit penal nga zonja Hykmete Bajrami e LDK-së, gjithçka mund të kthehet në pikën zero dhe vendi me automatizëm mund të shkojë në zgjedhje të jashtëzakonshme!
Pavarësisht kësaj, në zgjedhje të jashtëzakonshme mund të shkohet edhe pa vendim të gjykatës, pas konstituivit të Kuvendit, në rast të dështimit të zgjedhjes së kryeministrit me shumicë votash në Parlament!
Albin Kurtit i kanë mbetur vetëm dy rrugë: arritjen e pazareve politike me përfaqësuesit e partive minoritare dhe përmbushjen e orekseve pushtetore të Fatmir Limajt ose vendi do të shkojë në zgjedhje të jashtëzakonshme! Alternativë tjetër nuk ka!
Nuk ka vend për akuza të ndërsjella partiake, pasi verdikti qytetar i zgjedhjeve të 9 shkurtit 2025 e prodhojë këtë situatë të paqartë politike, ku “të gjithë kanë të drejtë që gabojnë”!
