Shkruan: Ismail MUÇIQI
Askush nuk e ka menduar se, pas 25 viteve në Liri dhe Pavarësi, Shteti i Kosovës do të përballej me bllokada, obstruksione dhe hile nga vetë politika Shqiptare. Këtë nuk e ka imagjinuar askush – as skeptikët me pikëpamjet më negative – që fati i Institucioneve të Kosovës do të varej nga deputetët e minoriteteve, të cilët, në shtete të ndryshme të Evropës, do ta kishin të vështirë të futeshin edhe në regjistrin e qytetarëve votues. Këtë situatë të dhimbshme për vendin e sollën “komandantët”, “gjeneralët”, “intelektualët” e rremë, “deputetët” pa integritet dhe servile – një pjesë e të cilëve kanë qenë pjesë në të gjitha legjislaturat që nga themelimi i Parlamentit të Kosovës. Inatet e politikanëve pa dinjitet, pa kulturë dhe pa moral kanë arritur ta përçajnë skenën politike, duke dëmtuar shtetin dhe kauzën kombëtare për interesat e tyre personale, familjare dhe karrieriste. A ka turp më të madh sesa Institucionet e Shtetit të mbeten peng i tekeve të njerëzve të parapolitikës, që janë pjesë e liderëve partiakë dhe grupeve të interesit? Për ta sjellë vendin në këtë gjendje nuk ranë dëshmorë as Adem Jashari me familje, as Agim Ramadani, as Sali Çekaj, Zahir Pajaziti me shokë, dhe shumë e shumë Heronj të tjerë të këtij vendi. Nuk ka nevojë për koment – për vite me radhë, individë dhe grupe të caktuara, përmes partive politike, e disa mediave dhe disa analistëve-opinionistë, kanë punuar fshehurazi, duke përdorur logjistikën për të krijuar përçarje dhe kaos në shoqërinë Kosovare. Mjerisht, si popull, na ka humbur rruga. Populli i Kosovës, edhe në kohërat më të vështira ka qenë më i ngritur, me i pjekur dhe më i përkushtuar. Sot mjerisht është i përçarë nga klasa politike. Dikur kemi ditur të lëmë mënjanë interesat personale për të sakrifikuar për të mirën e përbashkët të Shtetit. Sot, mafia ekonomike dhe biznesore i ka futur thellë duart në skenën politike, për ti mbrojtur interesat e saj mafioze, duke krijuar pasuri marramendëse përmes formave të ndryshme abuzive. Një numër i bizneseve dhe biznesmenëve të përfolur, të njohur që nga koha e Millosheviqit, të cilët janë pasuruar në dëm të popullit Shqiptar, sot kanë depërtuar thellë përmes kapitalit, por edhe në politikë – përmes mediave private, duke diktuar edhe politikën redaktuese e editoriale, me qëllim të manipulimit të opinionit publik. Kjo është pasqyra reale e gjendjes në shoqërinë tonë, ku politikën e bëjnë maskarenjtë – të neveritshëm dhe të padurueshëm edhe për popullin. Asgjë në këtë Botë nuk ndodh rastësisht. Populli Shqiptar, në periudhat më të rëndësishme të historisë, është dëmtuar nga vetë “bajraktarët” e politikës, të cilët më shumë kanë luftuar njëri-tjetrin për t’ia rrëmbyer pozitën, sesa kanë luftuar armikun. Edhe sot, në shekullin XXI, janë pikërisht politikanët ata që mbajnë përgjegjësinë kryesore për gjendjen në të cilën është katandisur vendi, – që fati i Institucioneve të Kosovës të varet nga vota e deputetes Duda Balje. Turp u qoftë të gjithë atyre që shkelin gjakun e atyre që ranë për Lirinë dhe Pavarësinë e Kosovës. Në fund, duhet theksuar se ka ardhur koha që disa politikanë, liderë partiakë e deputetë, do të skuqen përpara fëmijëve dhe familjarëve të tyre për veprimet e tyre të dëmshme ndaj popullit dhe Shtetit të Kosovës.
