Nga: Besim DYBELI –Kryetar i degës së UGSH-së, Qarku Elbasan
Kur gazetarë të një kombi bëhen bashkë
Ka vite që jo pak gazetarë të Kosovës janë prezent në Shqipëri. Kontributi i tyre mbetet i vlefshëm në median elektronike e atë të shkruar. Jo vetëm kaq. Ata bëhen bashkë me gazetarë të Shqipërisë në aktivitete kulturoro-artistike e me tematikë historike. Është Unioni i Gazetarëve Shqiptar me drejtues, Aleksandër Çipën, mbështetur nga 12 degët e UGSH-së në Qarqe, që kanë rritur këtë bashkëpunim. Përtej modestisë, ndër të tjerë, vlen për tu përmendur Ilir Krasniqi, Diana Bunaku, Alketa Gashi, Naime Beqiraj gjer tek gazetarja më e re, Ardina Morina. Aktiviteti “Dita e Miqësisë” , më së shumti ka përbashkuar gazetarë këndej e andej kufirit. Ky aktivitet rajonal ka “udhëtuar” disa herë në Kosovë, Preshevë, Maqedoni e më gjërë. Po ashtu dhe ndarja e çmimeve “Vangjush Gambeta”, për gazetarinë ekonomike, tashmë zhvillohet reciprokisht në Shqipëri e Kosovë. Të tilla bashkëpunime kanë rritur shkëmbimin e përvojës, profesionalizmin e miqësi të sinqerta. Bashkë janë gjendur dhe në aktivitete nëpër qytete të Shqipërisë për festa të fundvitit e ato me tematikë të caktuar. Së fundmi edhe ai i ndarjes së çmimit “Aristidh Kola”, që u mbajt në Divjakë turistike nga dega e UGSH, Fier, drejtuar nga Vladimir Muçaj. S’ka pse të mos jemi bashkë. Pavarësisht se në dy shtete, jemi një komb. Mbi të gjitha, për gazetarët, sfumohen kufijtë e doganat…Është koha për të qenë bashkë, jo vetëm kategoritë e publicistikës, por e gjithë shqiptarisë.
