SHBA është gati të propozojë që Evropa të njohë Krimenë si ruse kur zyrtarët të takohen të mërkurën në Londër për të diskutuar një zgjidhje paqësore të konfliktit në Ukrainë, shkruan sot agjencia ruse e lajmeve TASS, duke cituar Washington Post dhe burimet e saj.
Gazeta thekson se SHBA i paraqiti propozimet e saj Ukrainës javën e kaluar në Paris. Ato përfshijnë njohjen zyrtare të Krimesë nga Uashingtoni si territor rus dhe përfundimisht heqjen e sanksioneve kundër Rusisë sipas një marrëveshjeje të ardhshme. Në këmbim, Moska do t’i jepte fund armiqësive në Ukrainë në një kohë kur ushtria ruse ka vrull në fushën e betejës dhe avantazhe të rëndësishme, sipas TASS.
Zyrtarët evropianë dhe ukrainas kanë pranuar privatisht se Kievi nuk ka gjasa të rimarrë kontrollin e territoreve të kontrolluara nga Rusia së shpejti, thuhet në raport.
Sipas agjencisë Bloomberg, Uashingtoni u paraqiti aleatëve të tij propozime paraprake për zgjidhjen e Ukrainës në takimin e delegacionit të Kievit me përfaqësuesit e vendeve perëndimore në Paris më 17 prill. Midis tyre janë heqja dorë nga bisedimet për aspiratat e Ukrainës në NATO dhe lehtësimi i sanksioneve kundër Rusisë.
Propozimet parashikojnë gjithashtu se Rusia do të mbajë kontrollin mbi të gjitha territoret që ajo kontrollon.
