Bëhet fjalë të ashtuquajturën “Novo Javno Preduceze”, kompani e ujësjellësit dhe mbeturinave që ka funksionuar në komunën e Shtërpcës, të banuar me shumicë serbe. Lajmin e ka bërë të ditur ministrja në detyrë e Ekonomisë, Artane Rizvanolli.
“Pas kërkesës së Njësisë së Mbikqyrjes së Ndërmarrjeve Publike drejtuar Policisë së Kosovës, sot është mbyllur kompania paralele e Serbisë e ujësjellësit dhe mbeturinave ‘Novo Javno Preduzece’ e cila ka funksionuar në Shtërpcë”, ka shkruar ajo.
Tutje ka thënë se Ministria e Ekonomisë sipas mandatit dhe mekanizmave të saj është në shërbim të të gjithë qytetarëve pa dallim dhe në mbarë territorin e Republikës së Kosovës dhe në këtë drejtim do të punojmë në vazhdimësi dhe pa u ndalur.
“Asnjë institucion paralel i Serbisë nuk ka vend në Republikën e Kosovës. Asnjë paralelizëm i institucioneve tona e nën direktivat e Beogradit brenda territorit të vendit tonë nuk do të funksionojë në asnjë formë”, ka shkruar ajo në Facebook.
Rizvanolli ka falënderuar Policinë e Kosovës për mbështetjen dhe njëherësh ka kërkuar nga ta dhe nga Prokuroria hetime të menjëhershme mbi dëmet dhe përfitimet që janë sjellë nga veprimtaria e jashtëligjshme e këtij institucioni paralel të Serbisë.
