Rrjeti i Grave të Kosovës (RGK) përmes një komunikate për media shpreh shqetësim ndaj gjuhës fyese, denigruese dhe diskriminuese që po përdoret ndaj grave politikane në diskursin publik, veçanërisht në këtë periudhë të ndjeshme të formimit të legjislaturës së re dhe institucioneve të reja shtetërore.
Në reagim po ashtu thuhet se në një shoqëri demokratike si sot, gratë kanë të drejtë të marrin pjesë në jetën politike, të zgjidhen dhe të përfaqësojnë qytetarët në mënyrë të barabartë. Çdo tentativë për t’i nëpërkëmbur, për t’i sulmuar personalisht apo për t’i margjinalizuar, përbën jo vetëm shkelje të të drejtave të njeriut, por edhe cenon proceset demokratike të vendit tonë.
“RrGK rikujton se gjuha publike ka peshë të madhe dhe pasojë të drejtpërdrejtë në jetën dhe sigurinë e secilit politikan, burrë apo grua. Gjuha e urrejtjes, seksizmi dhe stereotipet gjinore nuk kanë vend në diskursin politik apo publik. Ne u bëjmë thirrje të gjitha partive politike, përfaqësuesve institucionalë, mediave dhe opinionit publik që të kontribuojnë në krijimin e një ambienti politik të dinjitetshëm, gjithëpërfshirës dhe respektues”, thuhet në reagim.
Tutje thuhet se nuk mund të ketë institucione të forta e përfaqësim të drejtë pa barazi gjinore. Prandaj, çdo sulm që bëhet ndaj njëri-tjetrit, pra ndaj atyre që angazhohen në politikë, është sulm ndaj vetë demokracisë.
Përmes këtij reagimi RrGK bënë thirrje organeve kompetente që të monitorojnë dhe të reagojnë ndaj gjuhës diskriminuese dhe të ndërmarrin masa adekuate për të mbrojtur të drejtat dhe dinjitetin e çdo individi, pa dallim gjinie.
