Presidenti SERB Aleksandar Vuçiq tha se ka idenë për të organizuar një forum të madh global në Beograd që do të mbledhë të gjithë liderët botërorë dhe se për këtë do të kërkojë mbështetje nga presidenti amerikan dhe ai rus, Donald Trump dhe Vladimir Putin.
“Do të kërkoj mbështetjen e Donald Jr. dhe Donald Sr. Trump dhe presidenti Putin. Kam një ide për të krijuar një forum të madh global me tema të ndryshme në Beograd vitin e ardhshëm”, tha Vuçiq në TV Informer, transmeton Tanjug.
Duke ndarë informacionin se ka marrë një ftesë nga Shtetet e Bashkuara (SHBA) në fillim të majit për të marrë pjesë në Komitetin Kombëtar Republikan, ai tha se do ta shfrytëzonte vizitën për të kërkuar mbështetje nga Trump dhe djali i tij për mbajtjen e një forumi global në Beograd vitin e ardhshëm.
Këtë e tha Vuçiq duke paralajmëruar vizitën e tij në SHBA, gjatë së cilës pret të ketë mundësinë të takohet me presidentin amerikan të paktën dy-tri herë brenda dy-tri ditëve.
Vuçiq: Në Evropë nuk mund të tregojnë forcën e tyre kundër Rusisë dhe Serbia është një mundësi ideale
Ai iu referua edhe “tentativës së arrestimit” të mbrëmshëm të presidentit të entitetit boshnjak Republika Srpska, Milorad Dodik, në Sarajevën Lindore, duke thënë se nuk e kuptonte nevojën për të arrestuar dikë sepse nuk ishte dakord me vendimin e Përfaqësuesit të Lartë.
Ai shtoi se shumë në Evropë “duhet t’i tregojnë forcën e tyre dikujt dhe se Republika Srpska dhe Serbia janë ideale për këtë.”
“Shumë në Evropë duhet t’ia tregojnë forcën dikujt, nuk mund t’ia bëjnë Rusisë, Kinës dhe mundësia ideale është që t’ia tregohet Republikës Srpska dhe në fund Serbisë. Ne menduam gabimisht se dikush do të përpiqet të paktën pjesërisht ta zgjidhë çështjen serbe në mënyrë të drejtë”, tha Vuçiq.
Një ditë më parë, të mërkurën, ai konfirmoi se do të marrë pjesë në paradën për shënimin e 80-vjetorit të fitores mbi fashizmin në Moskë më 9 maj dhe do të takohet me presidentin rus Vladimir Putin.
“Tetë muaj më parë thashë se do të shkoj në Moskë. Do të shkoj në Moskë,” tha Vuçiq.
