FSB ruse njoftoi arrestimin e Ivan Kuzin me dyshimin për përfshirje në vrasjen në rajonin e Moskës të nënkryetarit të Drejtorisë kryesore Operative të Shtabit të Përgjithshëm të Forcave të Armatosura Ruse, gjenerallejtënant Yaroslav Moskalik.
Sipas shërbimit të inteligjencës, Kuzin ka lindur në vitin 1983 dhe ka një leje qëndrimi ukrainase.
Hetimi pretendon se Kuzin vendosi një mjet shpërthyes të bërë vetë nën një makinë që ai e kishte blerë paraprakisht dhe më vonë e parkoi pranë shtëpisë në Balashikha ku jetonte Moskalik.
FSB pretendon se oficerët e inteligjencës ukrainase krijuan një vend të fshehtë në të cilin ruanin komponentët për eksplozivët që Kuzin përdori për të hedhur në erë makinën. Bomba dyshohet se është shpërthyer nga distanca nga territori ukrainas. Si pasojë e shpërthimit gjenerali, i cili po dilte nga hyrja e shtëpisë dhe po kalonte pranë makinës, ka humbur jetën në vend.
Kuzin u dërgua në Moskë për t’u marrë në pyetje nga Komiteti Hetimor. I arrestuari është i dyshuar për një rast të sulmit terrorist dhe ruajtjes së paligjshme të lëndëve plasëse.
