Presidentja e Republikës së Kosovës, Vjosa Osmani, ka reaguar ashpër ndaj dhunës fizike dhe verbale të ushtruar ndaj futbollistit të ri, Belgin Jashari. Përmes një deklarate publike, ajo e ka cilësuar ngjarjen si një akt të papranueshëm që cenon vlerat bazë të shoqërisë sonë, si respekti, barazia dhe dinjiteti njerëzor.
“Sporti duhet të jetë urë që lidh njerëzit, jo mur që i ndan,” ka theksuar Osmani, duke shtuar se çdo i ri duhet të ndihet i sigurt dhe i respektuar, pa dallim prejardhjeje apo identiteti.
Presidentja ka bërë thirrje që institucionet përkatëse të ndërmarrin masa urgjente për të hetuar rastin dhe për të ndëshkuar autorët e përfshirë në dhunë dhe fyerje. Ajo nënvizoi se askush nuk duhet të qëndrojë mbi ligjin, sidomos kur bëhet fjalë për cenimin e dinjitetit dhe sigurisë së të rinjve.
“Kosova është vend i lirë e demokratik. Dhuna dhe urrejtja nuk do të kenë vend në fushat tona të sportit, as në shoqërinë tonë. Askush nuk mund të qëndrojë mbi ligjin kur cenon dinjitetin dhe sigurinë e të rinjve tanë.Belgin, ti je pjesë e të tashmes dhe të ardhmes sonë! Kosova është krenare me ty!,” ka përfunduar presidentja Osmani në reagimin e saj.
