Kryetari i Lidhjes Demokratike të Kosovës, Lumir Abdixhiku, ka përkujtuar 26 vjetorin e Masakrës së Mejës.
“Më 27 prill 1999, Kosova përjetoi një nga plagët më të rënda në historinë e saj,” ka thënë Abdixhiku në një postim në Facebook. “Në atë ditë të rëndë, 376 civilë shqiptarë u morën mizorisht nga jeta nga forcat policore dhe ushtarake serbe.”
Ai ka theksuar se Aparati shtetëror serb organizoi izolimin e mbi 15 fshatrave, duke grumbulluar dhe ekzekutuar djemtë e burrat tanë para syve të familjarëve të tyre, në një pamje që, sipas tij, “as koha nuk do të mund ta fshijë nga kujtesa jonë”.
Në këtë ditë përkujtimi, Abdixhiku ka shprehur se dhimbja e familjeve të viktimave është një plagë e përbashkët për gjithë shoqërinë kosovare, ndërsa Masakra e Mejës është simbol i sakrificës për liri.
“Çmimi i lirisë së Kosovës ka qenë çmim i vetë jetës sikurse i 376 civilëve të Mejës,” ka shkruar ai.
Kreu i LDK-së ka kujtuar gjithashtu se sot shënohet edhe Dita Kombëtare e Personave të Zhdukur në Kosovë, duke apeluar për drejtësi dhe zbardhjen e fatit të 1617 qytetarëve ende të zhdukur.
“Kosova s’mund të ecë përpara pa gjetjen e qetësisë për familjarët e të pagjeturve,” ka thënë Abdixhiku, duke përmbyllur mesazhin e tij me nderime për të gjithë dëshmorët: “Lavdi përjetësisht dëshmorëve të Masakrës së Mejës dhe të gjithë të rënëve gjithandej Kosovës!”.
