Kryeministri francez François Bayrou ka dënuar vrasjen e një besimtari mysliman në një xhami në Francën jugore, duke e quajtur atë një “krim islamofobik”. I dyshuari, një shtetas francez me origjinë boshnjake, është ende i lirë. Autoritetet po hetojnë rastin si një krim i mundshëm i urrejtjes.
Kryeministri Bayrou postoi një mesazh në rrjetin social X të shtunën duke dënuar sulmin vdekjeprurës në të cilin u vra një besimtar, ndërsa forcat e policisë kërkuan për sulmuesin që filmoi viktimën teksa vdiste.
Sulmuesi goditi një adhurues dhjetëra herë me thikë dhe më pas e filmoi atë në celularin e tij duke fyer Islamin gjatë sulmit të premten në fshatin La Grand-Combe në rajonin Gard të Francës jugore, raporton France24 .
“Dje u vra një besimtar”, shkroi Bayrou. “Krimi islamofobik u shfaq në video”, shtoi ai.
“Ne qëndrojmë me familjen e viktimës dhe me të gjithë besimtarët që janë prekur thellë. Shërbimet shtetërore janë mobilizuar për të arrestuar dhe dënuar vrasësin,” shkroi Bayrou.
Hetuesit njoftuan më herët të shtunën se po e trajtonin rastin si një krim të mundshëm islamofobik.
Identifikohet i dyshuari që filmoi krimin e tij
Prokurori rajonal Abdelkrim Grini i tha AFP se i dyshuari ishte ende i lirë të shtunën.
Një video e marrë nga sulmuesi tregon se ai fyen Allahun menjëherë pas sulmit.
I dyshuari ia dërgoi videon një personi tjetër, i cili më pas e shpërndau atë në rrjetet sociale, por më vonë e fshiu atë.
Vrasja nuk u shfaq drejtpërdrejt në pamjet e postuara në rrjetet sociale, por u kap nga një kamera sigurie brenda xhamisë. Në një video që ka regjistruar vetë, sulmuesi vëren kamerat dhe dëgjohet duke thënë: “Patjetër që do të arrestohem”.
Sipas një burimi tjetër, i cili gjithashtu ka dashur të mbetet anonim, i dyshuari është identifikuar si një shtetas francez me origjinë boshnjake, i cili nuk është mysliman.
“Ky person është duke u kërkuar aktivisht. Rasti po merret shumë seriozisht”, tha prokurori Grini.
Viktima – një i ri nga Mali
Ai shtoi se janë duke u shqyrtuar të gjitha mundësitë, duke përfshirë se është një akt islamofobik.
Prokuroria franceze kundër terrorizmit po shqyrton marrjen përsipër të hetimeve.
Viktima dhe sulmuesi ishin vetëm në xhami në momentin e sulmit.
Pasi u lutën së bashku për një kohë, sulmuesi goditi viktimën deri në 50 herë me thikë përpara se të ikte.
Trupi i viktimës u gjet vetëm më vonë në mëngjes nga besimtarët e tjerë që kishin ardhur për t’u falur.
Sipas prokurorit Grini, viktima ishte një i ri 23 apo 24 vjeç, vizitor i rregullt i xhamisë. Sulmuesi nuk është parë kurrë më parë atje.
Sipas deklaratave të disa banorëve të zonës për AFP, viktima ishte një i ri me origjinë nga Mali, i cili kishte ardhur në fshat disa vite më parë dhe ishte shumë i respektuar në komunitet.
La Grand-Combe, një ish qendër minerare dhjetë kilometra larg qytetit të Alès, sot ka një nga normat më të larta të papunësisë në Francë pas mbylljes së minierave të qymyrit.
Ministri i Brendshëm Bruno Retailleau e përshkroi vrasjen si “të tmerrshme” të premten.
Ai shprehu “mbështetje për familjen e viktimës dhe solidaritet me komunitetin mysliman të prekur nga kjo dhunë barbare në vendin e faljes, ditën e faljes”.
