I plagosur në luftën çlirimtare, veterani nga Klina, Kristë Lekaj, kërkon ndihmë financiare për t`u shëruar. Shuma që ai kërkon është 15.000 euro e të cilën e ka të pamundur ta siguroj vetë, ngase ai ka vetëm pensionin e veteranit prej 200 eurosh.
Krist Lekaj nga Klina, veteran i luftës së UÇK-së, i cili të vetmin burim jetese e ka pagën e veteranit, para një viti ka bërë një intervenim kirurgjik në boshtin kurrizor por që nuk ka gjetur shërim. Lekaj thotë se mjekët i kanë rekomanduar një tjetër ndërhyrje por që, siç thotë ai, nuk i ka mjetet e nevojshme për të qenë e suksesshme ndërhyrja, sepse shuma që kërkohet është e papërballueshme për të.
“Kjo është një shumë e madhe për mua. Është shumë prej 15 mijë euro. Unë me një rrogë të veteranit 200 euro e me mbajt edhe familjen nuk ka mundësi. Kështu që kisha bë apel tek ndonjë bamirës që ka vullnetin e mirë me më ndihmua me krye ketë shërim. Letrat e mjekut i kam krejt këtu”, thotë ai.
Me rastin e intervenimit të parë kirurgjik Lekaj thotë se është ndihmuar nga të afërmit e tij.
“Operacionin e parë ma kanë krye djemtë e mixhës me vëlla, jashtë i kanë mbledhur mjetet 4 mijë euro. Tash po më vjen zor me i skuq prapë ata meqenëse nuk kam rrugëdalje pa e bë. Me kanë qysh jam kanë i zoti kur kam punua nga pak me rryme e me asi, nuk kam pasur kurrfarë nevoje po tash kam mbet, as nuk jam në gjendje për me punua e as në gjendje me e mbajt familjen time me këtë rrogë që e kam”, thotë Lekaj.
Llekaj thotë se me gjithë dokumentacionin mjekësor, disa herë ka qenë edhe në QKUK ku i është thënë se duhet të presë në radhë deri në katër vjet, prandaj shprehet ai, kjo ndërhyrje duhet të bëhet në një klinikë private në Kosovë, për të cilën i duhet ndihma e shoqërisë.
Të gjithë ata që duan ta ndihmojnë, mund ta kontaktojnë direkt Krist Lekaj në numrin 045 477 791
