Shkruan: Ismail MUÇIQI
Deri kur populli i Kosovës do të mashtrohet nga politika qorre, e cila ka arritur në pikën më të ulët nervore të dështimit dhe manipulimit? Si mund t’i thuhet kësaj logjike patologjike të këtyre deputetëve pa asnjë vlerë: Shtatë seanca të dështuara, të bllokuara kundër vendit, kundër shtetit! Këta matrapazë pa dinjitet, pasi bllokuan procesin e konstituivit të Parlamentit, nuk hoqën dorë nga mëditjet për shtatë seanca të dështuara. Këta shantazhues na bënë horë, duke e zbehur imazhin e shtetit të Kosovës. Askush nuk e kishte menduar se do të vinte dita që ky soj njerëzish pa dinjitet do ta udhëhiqnin Kosovën. Këta deputetë do të tallen me popullin derisa shtresa intelektuale — që sot nuk dihet nëse ekziston dhe qytetarët qëndrojnë të strukur, pasiv, qëndrojnë ne gjumë. Deklaratat e Hikmete Bajramit janë aq denigruese në raport me gjendjen ekzistuese, saqë tregojnë nivelin e mjerë intelektual të një gruaje që ushtron detyrën e ligjërueses universitare. Deklaratat e saja nuk ka asgjë të përbashkët me “filozofinë Rugoviste” në të cilën këto struktura të konsumuara të Lidhjes Demokratike të Kosovës vazhdojnë të thirren. Të njëjtën retorikë e përsëriti edhe deputetja e Aleancës për Ardhmërinë e Kosovës, Time Kadrija, e cila, si duket, do të pensionohet si deputete në Parlamentin e Kosovës. Partia Demokratike e Kosovës po i fërkon duart me shpresë për t’u rikthyer në pushtet. Këta “e duan shumë” Kosovën dhe pushtetin, përmes të cilit kanë arritur t’i realizojnë pothuajse të gjitha qëllimet dhe aspiratat për pasurim personal. Heshtja dhe abstenimi i Fatmir Limajt është një taktikë — një kalkulim për qëllime strategjike — për t’u bërë hisedar në qeverisje, kushdo që e formon Qeverinë e Kosovës. Ky është niveli i pjekurisë politike dhe intelektuale të deputetëve Shqiptarë, të përçarë, me të cilët po tallet Lista Serbe dhe deputetët e minoriteteve, të cilët kërkojnë komuna dhe benefite, duke e dëmtuar edhe më shumë shtetin e Kosovës. Ndërkohë, Glauk Konjufca, i cili ka hequr dorë nga kandidimi për t’u rizgjedhur sërish kryetar i Parlamentit, po kërkon përafrim dhe bashkëpunim njerëzor, duke apeluar te partitë tjera që të votojnë për konstituivin e Parlamentit të Kosovës, i cili po hyn në historinë e parlamentarizmit me shtatë dështime dhe shtatë bllokada. Këta janë deputetët Shqiptarë të botës së çudirave!
