Policia e Kosovës në bashkëpunim me zyrtarët doganorë në pikëkalimin kufitar në Bërnjak kanë gjetur një shumë parash të padeklaruara gjatë kontrollit të një automjeti me targa serbe i cili drejtohej nga një shtetas i Serbisë.
Policia ka bërë të ditur se tek i dyshuari kanë gjetur 11 mijë e 300 euro dhe mbi 79 mijë dinarë të Serbisë apo rreth 678 euro.
“Me datën 27.04.2025 rreth orës 12:55 në pikëkalimin kufitar në Bërnjak në hyrje të Republikës së Kosovës, zyrtarët policorë kufitarë, në bashkëpunim edhe me zyrtarët doganorë, kanë realizuar një kontroll të përbashkët, me ç’rast gjatë kontrollit në një automjet me targa serbe me drejtues shtetas të Serbisë, janë gjetur 11.300 (njëmbëdhjetëmijë e treqind) euro në kartëmonedha dhe 79.780 (shtatëdhjetë e nëntëmijë e shtatëqind e tetëdhjetë) dinarë të SRB-së në kartëmonedha (rreth 678 euro sipas kursit zyrtar) të padeklaruara”, thuhet në njoftim.
Siç njofton Policia rasti është duke u trajtuar në procedurë të mëtejme për kundërvajtje doganore nga ana e Doganës së Kosovës.
